മലയാളികൾ ആവേശത്തോടെ കാത്തിരിക്കുന്ന സിനിമയാണ് പൃഥ്വിരാജ് സംവിധാനം ചെയ്യുന്ന എമ്പുരാൻ. ചിത്രവുമായി ബന്ധപ്പെട്ട് ഓരോ വാർത്തകൾ പുറത്തുവരുമ്പോഴും ആരാധകർ വളരെ ആവേശത്തോടെയാണ് അവയെ സ്വീകരിക്കുന്നത്. ഇപ്പോൾ സിനിമയുമായി ബന്ധപ്പെട്ട് പുറത്തുവരുന്ന അഭ്യൂഹമാണ് പ്രേക്ഷകർക്കിടയിലെ ചർച്ചാവിഷയം. എമ്പുരാനിൽ മോഹൻലാലിനും പൃഥ്വിരാജിനുമൊപ്പം മമ്മൂട്ടിയും എത്തുന്നു എന്നതാണ് പുറത്തുവരുന്ന റിപ്പോർട്ടുകൾ.
എമ്പുരാൻ ഫാൻസ് പേജുകളിലുൾപ്പെടെ ഇതുമായി ബന്ധപ്പെട്ട റിപ്പോർട്ടുകൾ പ്രചരിക്കുന്നുണ്ട്. ചിത്രത്തിൽ മോഹൻലാലിൻ്റെ കഥാപാത്രമായ ഖുറേഷി അബ്രഹാമിൻ്റെ ഗോഡ്ഫാദറായും സംവിധായകൻ പൃഥ്വിരാജ് അവതരിപ്പിച്ച കഥാപാത്രമായ സായിദ് മസൂദിൻ്റെ പിതാവായുമാണ് മമ്മൂട്ടിയെത്തുകയെന്നാണ് അഭ്യൂഹം. പുറത്തുവരുന്ന റിപ്പോർട്ടുകൾ ശരിയാണെങ്കിൽ 2008-ൽ പുറത്തിറങ്ങിയ ട്വന്റി:20ക്ക് ശേഷം മോഹൻലാലും മമ്മൂട്ടിയും ഒന്നിച്ചെത്തുന്ന ചിത്രമാകും എമ്പുരാൻ.
അതേസമയം വിക്കിപീഡിയയിൽ എമ്പുരാൻ്റെ കാസ്റ്റ് ലിസ്റ്റിലും മമ്മൂട്ടിയുടെ പേര് ചേർക്കപ്പെട്ടിട്ടുണ്ട്. മോഹൻലാൽ, മമ്മൂട്ടി, പൃഥ്വിരാജ് എന്നാണ് വിക്കിപീഡിയയിൽ ഇപ്പോൾ കൊടുത്തിരിക്കുന്ന കാസ്റ്റ് ലിസ്റ്റ്. മാത്രമല്ല, മോഹൻലാലും പ്രൊഡക്ഷൻ ബാനർ ആശിർവാദ് സിനിമാസുമായി മമ്മൂട്ടി സഹകരിക്കുന്നതിനെക്കുറിച്ച് നിർമ്മാതാവ് ആൻ്റണി പെരുമ്പാവൂർ ദിവസങ്ങൾക്ക് മുമ്പ് സൂചന നൽകുകയും ചെയ്തിരുന്നു. ചിത്രത്തിന്റെ ലൊക്കേഷനിൽ മൂവരുടെയും കാറുകൾ നിർത്തിയിട്ടിരിക്കുന്ന ചിത്രങ്ങളും സാമൂഹ്യമാധ്യമങ്ങളിൽ പ്രചരിക്കുന്നുണ്ട്.
ഇതുമായി ബന്ധപ്പെട്ട് ഇതുവരെ ഔദ്യോഗിക പ്രതികരണങ്ങൾ പുറത്തുവന്നിട്ടുമില്ല. 2025 മാർച്ച് 28-ന് എമ്പുരാൻ റിലീസ് ചെയ്യുമെന്നാണ് റിപ്പോർട്ട്. മുരളി ഗോപിയാണ് ചിത്രത്തിന്റെ തിരക്കഥയൊരുക്കുന്നത്.
