മലയാളികൾക്ക് വളരെ പ്രിയപ്പെട്ട ശബ്ദത്തിന് ഉടമയാണ് ഡബ്ബിങ് ആർട്ടിസ്‌റ്റ് ഭാഗ്യലക്ഷ്മി. സിനിമയ്ക്ക് പുറമെ സാമൂഹിക വിഷയങ്ങളിലും നിലപാട് വ്യക്തമാക്കുന്ന താരം ഇപ്പോൾ തന്റെ ജീവിതത്തിലെ ദു:ഖകരമായ അവസ്ഥയിലൂടെയാണ് കടന്നുപോകുന്നത്. ഒരുപാട് ആധ്വാനിച്ച് ആശിച്ച് പണിത വീട് വിൽക്കേണ്ടി വരികയും അത് വാങ്ങിയവർ വീട് പൊളിക്കുന്നത് കാണേണ്ടിവരികയും ചെയ്തതിന്റെ വേദനയിലാണ് ഭാഗ്യലക്ഷ്മി.
തിരുവനന്തപുരത്ത് ഭാഗ്യലക്ഷ്മി നിർമ്മിച്ച ‘സ്വരം’ എന്ന വീട് കുറച്ച് നാളുകൾക്ക് മുമ്പ് വിറ്റിരുന്നു. ഇപ്പോൾ അത് വാങ്ങിയവർ വീട് പൊളിക്കുകയും ചെയ്തു. ഇതോടെ ആ വീട് നിർമ്മിക്കാൻ എത്രമാത്രം കഷ്ടപ്പെട്ടുവെന്ന് ഓർക്കുകയാണ് താരം. വീടിന്റെ പാലുകാച്ചലിന്റെയും കുടുംബത്തോടൊപ്പമുള്ള വീട്ടിലെ സന്തോഷ നിമിഷങ്ങളുടെയും ദൃശ്യങ്ങൾ പങ്കുവെച്ച താരം ഒടുവിൽ വീട് പൊളിക്കുന്നതിന്റെ ദൃശ്യങ്ങളും ആരാധകരുമായി പങ്കുവെച്ചിട്ടുണ്ട്. ഹൃദയംതൊടുന്ന കുറിപ്പോടെയാണ് ഭാഗ്യലക്ഷ്മി ഇവ പങ്കിട്ടിരിക്കുന്നത്.
“1985-ൽ തിരുവനന്തപുരത്തേക്ക് വിവാഹം കഴിഞ്ഞെത്തുമ്പോൾ ഒരു ഒറ്റ മുറിയിലേക്ക് ആയിരുന്നു ഞാൻ കയറി ചെന്നത്. അന്ന് മനസിൽ തോന്നിയ ഒരു സ്വപ്‌നമായിരുന്നു സ്വന്തമായി ഒരു വീട്. അങ്ങനെ എൻ്റെ ശബ്ദം കൊണ്ട് അധ്വാനിച്ച് ഞാനൊരു വീട് പണി തുടങ്ങി. സ്വരം എന്ന് പേരുമിട്ടു. ആ വീട്ടിൽ താമസിച്ചു തുടങ്ങിയപ്പോൾ എന്തോ ഈ വീട്ടിൽ ഞാൻ അധികകാലം താമസിക്കില്ല എന്നൊരു തോന്നൽ എന്റെ ഉള്ളിൽ വന്നുകൊണ്ടേയിരുന്നു. 2000-ൽ ഞാൻ അവിടെ നിന്ന് പടിയിറങ്ങി. പിന്നീട് 2020ൽ വീണ്ടും ഞാനങ്ങോട്ട് കയറി ചെന്നപ്പോൾ എനിക്കെന്തോ ആ വീട്ടിൽ താമസിക്കാൻ തോന്നിയില്ല. എനിക്ക് മാത്രമല്ല എൻ്റെ മക്കൾക്കും തോന്നിയില്ല.
അങ്ങനെ ഞങ്ങൾ ആ വീട് ഉപേക്ഷിക്കാൻ തന്നെ തീരുമാനിച്ചു. വീട് സ്വന്തമാക്കിയ ആൾ അത് പൊളിക്കുന്നത് കണ്ടപ്പോൾ മനസിനുള്ളിൽ എവിടെയോ ഒരു വിങ്ങൽ പോലെ. അങ്ങനെ സ്വരം കൊണ്ട് പണിത ഈ വീട് ഇതാ നിലംപതിച്ചിരിക്കുന്നു. കിളി കൂട് കൂട്ടുന്നപോലെയാണ് അന്ന് ഞാൻ ഈ വീട് വച്ചത്. മദ്രാസിലേക്ക് പറന്നു പോയി ഒരു ചുള്ളിക്കമ്പു കൊത്തിക്കൊണ്ട് വരും പോലെ പണവും കൊണ്ടുവരും, വീണ്ടും പോകും വരും, ഒടുവിൽ താമസമായപ്പോഴോ സമാധാനമില്ല. പിന്നെ ഒട്ടും ആലോചിച്ചില്ല. സ്നേഹമില്ലാത്തിടത്ത്, സമാധാനമില്ലാത്തിടത്ത് ഒരു നിമിഷംപോലും നിൽക്കരുത്. ഉപേക്ഷിക്കണം. അതെത്ര വിലപിടിപ്പുള്ളതായാലും. സമാധാനമാണ് ഒരു മനുഷ്യന് സന്തോഷം തരുന്നത്.” എന്നാണ് ഭാഗ്യലക്ഷ്മി പറയുന്നത്.
