സിനിമയുടെ പേര് വിവാദം നിലനിൽക്കുന്ന സാഹചര്യത്തിൽ രണ്ട് ‘ജയിലര്‍’ സിനിമകളും ഒന്നിച്ച് തിയറ്ററുകളിൽ എത്തുന്നു. തമിഴ് സൂപ്പർ താരം ജനികാന്ത് ചിത്രം ജയിലറും ധ്യാന്‍ ശ്രീനിവാസൻ ചിത്രം ജയിലറും ഒരേ ദിവസം തിയേറ്ററുകളിലേക്ക് എത്തും. ഓഗസ്റ്റ് 10ന് ആണ് രണ്ട് ചിത്രങ്ങളും റിലീസിനെത്തുന്നത്. ജയിലര്‍ എന്ന ടൈറ്റിലിനെ ചൊല്ലി ഇരു ചിത്രങ്ങളുടെയും നിർമാതാക്കള്‍ക്ക്‌ ഇടയിലുള്ള തര്‍ക്കം ഇപ്പോള്‍ കോടതിയുടെ പരിഗണനയിലാണ്. പേരിലെ സാമ്യം ചൂണ്ടിക്കാട്ടി തമിഴ് ചിത്രത്തിന്റെ നിർമാതാക്കളായ സണ്‍ പിക്‌ചേഴ്‌സിന് മലയാള ചിത്രത്തിന്റെ അണിയറ പ്രവര്‍ത്തകരാണ് നോട്ടീസ് അയച്ചത്.
അതേസമയം പേര് മാറ്റാന്‍ പറ്റില്ല എന്നാണ് സണ്‍ പിക്‌ചേഴ്‌സ് അറിയിച്ചിരിക്കുന്നത്. ഇത് സംബന്ധിച്ച് മലയാള ചിത്രത്തിന്റെ അണിയറ പ്രവര്‍ത്തകര്‍ മദ്രാസ് ഹൈക്കോടതിയില്‍ സമര്‍പ്പിച്ചിരിക്കുന്ന വക്കാലത്ത് ഓഗസ്റ്റ് രണ്ടിന് കോടതി പരിഗണിക്കും. മലയാളത്തിൽസക്കീര്‍ മഠത്തില്‍ സംവിധാനം ചെയ്യുന്ന ചിത്രത്തിൽ പേര് സൂചിപ്പിക്കുന്നത് പോലെ ഒരു ജയിലറുടെ വേഷത്തിലാണ് നായകനായ ധ്യാന്‍ എത്തുന്നത്.
ജയില്‍ ചാടി പോകുന്ന കുറ്റവാളികളും അവരുടെ പിന്നാലെയുള്ള ജയിലറിന്‍റെ ഓട്ടവുമാണ് ധ്യാൻ ശ്രീനിവാസന്റെ ചിത്രം പറയുന്നത്. ഗോൾഡൻ വില്ലേജിന്റെ ബാനറിൽ എൻ.കെ. മുഹമ്മദ് ആണ് ചിത്രത്തിന്റെ നിര്‍മാണം. ദിവ്യ പിള്ള നായികയായി എത്തുന്ന ഈ ചിത്രത്തിൽ ശ്രീജിത്ത് രവി, മനോജ് കെ ജയൻ, നവാസ് വള്ളിക്കുന്ന്, ഉണ്ണി രാജ, ബിനു അടിമാലി, ജയപ്രകാശ്, ബി.കെ. ബൈജു എന്നിവരും പ്രധാന വേഷത്തിൽ എത്തുന്നുണ്ട്.
