തമിഴ് സിനിമാതാരങ്ങൾക്ക് വിലക്കേർപ്പെടുത്തി തമിഴ്നാട് ഫിലിം പ്രൊഡ്യൂസേഴ്സ് അസോസിയേഷൻ. ധനുഷ്, വിശാൽ, സിലമ്പരശൻ, അഥർവ എന്നിവർക്കാണ് വിലക്കേർപ്പെടുത്തിയത്. ഇവരുമായി സഹകരിക്കില്ലെന്ന് സംഘടന ഭാരവാഹികൾ വ്യക്തമാക്കി. ഇന്ന് ചേർന്ന നിർമ്മാതാക്കളുടെ യോഗത്തിലാണ് തീരുമാനമെടുത്തത്. താരങ്ങൾക്കെതിരെ വിവിധ നിർമ്മാതാക്കൾ നൽകിയ പരാതിയുടെ അടിസ്ഥാനത്തിലാണ് നടപടി. വിലക്ക് എത്രനാൾ നീണ്ടുനിൽക്കുമെന്ന് വ്യക്തമല്ല.
സിനിമാ നിർമ്മാതാക്കൾക്ക് നഷ്ടമുണ്ടാക്കിയതായി ധനുഷിനെതിരേ നേരത്തേ പരാതി ഉയർന്നിരുന്നു. സിലമ്പരശനെതിരെയും അഥർവയ്ക്കെതിരേയും സമാനമായ പരാതിയാണ് നിലവിലുള്ളത്. നേരത്തേ പ്രൊഡ്യൂസേഴ്സ് അസോസിയേഷന്റെ ഭാരവാഹിയായിരുന്ന വിശാൽ സംഘടനയുടെ ഫണ്ട് ദുരുപയോഗം ചെയ്തതിനാണ് നടപടി നേരിട്ടത്.
