മഹേശ്വറും അലീനയും വീശാൽ കൃഷ്ണമൂർത്തിയും വീണ്ടും ജനങ്ങൾക്കിടയിലേയ്ക്ക് എത്തി. സിബി മലയിൽ സംവിധാനം ചെയ്ത ഹൊററും മിസ്റ്ററിയും പ്രണയവും സംഗീതവുമെല്ലാം ഇഴചേർന്ന ദേവദൂതൻ 24 വർഷങ്ങൾക്ക് ശേഷം ഇന്ന് വീണ്ടും റിലീസ് ചെയ്തിരിക്കുകയാണ്. ഫോർ കെ മികവിലാണ് ദേവദൂതൻ തിയേറ്ററിലെത്തിയിരിക്കുന്നത്.
വിശാൽ കൃഷ്ണമൂർത്തി എന്ന സംഗീതജ്ഞനായി മോഹൻലാൽ എത്തിയ ചിത്രത്തിലെ ഗാനങ്ങളെല്ലാം തന്നെ വളരെ ശ്രദ്ധേയമായിരുന്നു. 2000-ൽ റിലീസ് ചെയ്ത ദേവദൂതന് അക്കാലത്ത് വലിയ ചലനം സൃഷ്ടിക്കാൻ സാധിച്ചില്ലെങ്കിലും പതിയെ പതിയെ പ്രേക്ഷകർ ചിത്രത്തെ ഏറ്റെടുക്കുകയായിരുന്നു. ചിത്രത്തിൽ മോഹൻലാൽ കഥാപാത്രത്തോടൊപ്പം ജയപ്രദയുടെ അലീന അഥവാ ആഞ്ജലീന, വിനീത് കുമാറിൻ്റെ മഹേശ്വർ എന്നീ കഥാപാത്രങ്ങൾ ഇന്നും പ്രേക്ഷക മനസിൽ മായാതെ നിൽപ്പുണ്ട്.
രഘുനാഥ് പലേരി തിരക്കഥയെഴുതിയ ചിത്രം നിർമ്മിച്ചിരിക്കുന്നത് കോക്കേഴ്സ് മീഡിയാ എന്റർടെയിൻമെൻ്റ്സ് ആണ്. ചിത്രം ആദ്യമായി റിലീസ് ചെയ്തപ്പോൾ വിജയിച്ചില്ലെങ്കിലും 4 കെ മികവിൽ ജനങ്ങൾ ചിത്രത്തെ ഏറ്റെടുക്കുമോയെന്ന് കാത്തിരുന്ന് കാണാം.
