5 വർഷത്തെ ആരാധകരുടെ കാത്തിരിപ്പിന് വിരാമമിട്ട് താരജോഡികളായ ദീപിക പദുക്കോണും രൺവീർ സിങ്ങും തങ്ങളുടെ വിവാഹ വീഡിയോ പുറത്തുവിട്ടു. അഞ്ചാം വാർഷികം ആഘോഷിക്കാനിരിക്കെയാണ് ഇരുവരുടെയും വിവാഹ വീഡിയോ പുറത്തുവന്നിരിക്കുന്നത്. കരൺ ജോഹർ അവതാരകനായുള്ള കോഫി വിത്ത് കരൺ എന്ന ഷോയിലൂടെയാണ് വീഡിയോ റിലീസ് ചെയ്തത്.
വിവാഹനിശ്ചയത്തിന്റേയും പഞ്ചാബി – കൊങ്കണി ആചാരപ്രകാരം നടന്ന വിവാഹത്തിന്റേയും വിവാഹ സത്കാരങ്ങളുടേയും ഹൽദി, മെഹന്ദി ചടങ്ങുകളുടേയുമെല്ലാം ദൃശ്യങ്ങൾ വീഡിയോയിൽ ഉൾപ്പെടുത്തിയിട്ടുണ്ട്. ഒരു പാർട്ടിയിൽ വെച്ച് ദീപികയോടുള്ള പ്രണയം വ്യക്തമാക്കുന്ന രൺവീറിന്റെ വാക്കുകളോടെയാണ് വീഡിയോ ആരംഭിക്കുന്നത്. സൗഹൃദത്തിൽ നിന്ന് പ്രണയത്തിലേക്കും വിവാഹത്തിലേക്കുമുള്ള യാത്രയേക്കുറിച്ചും ഇരുവരും മനസുതുറക്കുന്നുണ്ട്.
2013-ൽ റിലീസ് ചെയ്ത ഗോലിയോം കി രാസ്ലീല രാംലീല എന്ന ചിത്രത്തിന്റെ ഷൂട്ടിങ്ങിനിടയിലാണ് ദീപികയും രൺവീറും തമ്മിൽ പ്രണയത്തിലാകുന്നത്. രണ്ട് വർഷത്തിന് ശേഷം 2015-ൽ മാലിദ്വീപിൽവെച്ച് രൺവീർ ദീപികയെ പ്രൊപ്പോസ് ചെയ്യുകയും തുടർന്ന് രഹസ്യമായി വിവാഹനിശ്ചയം നടത്തുകയുമായിരുന്നു. പിന്നീട് 2018 നവംബർ 14-ന് ഇറ്റലിയിൽ വെച്ചായിരുന്നു ഇരുവരുടേയും വിവാഹം.
