ഉലകനായകൻ കമൽഹാസന്റെ 69-ാം ജന്മദിനത്തിൽ ആശംസകൾ അറിയിച്ച് മുഖ്യമന്ത്രി പിണറായി വിജയൻ. അതുല്യനടനും പ്രിയ സുഹൃത്തുമായ കമൽഹാസന് ജന്മദിനാശംസകൾ എന്ന് തുടങ്ങുന്ന കുറിപ്പോടെയാണ് മുഖ്യമന്ത്രി താരത്തിന് പിറന്നാൾ ആശംസ നേർന്നത്.
‘അതുല്യനടനും പ്രിയ സുഹൃത്തുമായ കമൽഹാസന് ജന്മദിനാശംസകൾ. നടനെന്നതിനുപരി സിനിമാ നിർമ്മാണവുമായി ബന്ധപ്പെട്ട എല്ലാ മേഖലകളിലും തന്റേതായ മുദ്ര പതിപ്പിച്ച പ്രതിഭാശാലിയാണ് കമൽഹാസൻ. മതനിരപേക്ഷ, പുരോഗമനാശയങ്ങൾ മുറുകെപ്പിടിക്കുന്ന പൊതുപ്രവർത്തകൻ കൂടിയാണദ്ദേഹം. കലാമേഖലയിലെ സംഭാവനകൾക്കൊപ്പം ഈ സാമൂഹിക പ്രതിബദ്ധതയും അദ്ദേഹത്തിന് ജനഹൃദയങ്ങളിൽ വലിയ ഇടം നൽകി. കേരളത്തെ സ്വന്തം നാടെന്ന നിലയിൽ കാണുന്ന കമൽ നാം കൈവരിച്ച സാമൂഹിക പുരോഗതിയിൽ അഭിമാനം കൊള്ളുന്നു. പ്രിയ കമൽഹാസന് എല്ലാവിധ ഭാവുകങ്ങളും ആയുരാരോഗ്യ സൗഖ്യവും ഹൃദയപൂർവ്വം നേരുന്നു’ എന്നാണ് മുഖ്യമന്ത്രി സാമൂഹ്യമാധ്യമത്തിൽ കുറിച്ചത്.
സിനിമാ താരങ്ങളും പൊതുപ്രവർത്തകരും ആരാധകരുമുൾപ്പെടെ നിരവധി പേരാണ് കമൽഹാസന് പിറന്നാൾ ആശംസ അറിയിക്കുന്നത്. താരത്തിന്റെ ജന്മദിനത്തോടനുബന്ധിച്ച് കമൽഹാസൻ – മണിരത്‌നം കൂട്ടുകെട്ടിൽ ഒരുങ്ങുന്ന ‘തഗ് ലൈഫ്’ എന്ന ചിത്രത്തിന്റെ ടൈറ്റിലും പ്രഖ്യാപിച്ചിരിക്കുകയാണ് അണിയറപ്രവർത്തകർ.
