അഞ്ചാം പാതിരാ, കുമ്പളങ്ങി നൈറ്റ്സ്, മഹേഷിന്റെ പ്രതികാരം തുടങ്ങി നിരവധി ഹിറ്റ് സിനിമകളുടെ എഡിറ്റർ സൈജു ശ്രീധരൻ ആദ്യമായി സംവിധാനം ചെയ്യുന്ന ചിത്രമാണ് ‘ഫൂട്ടേജ്’. നടി മഞ്ജു വാര്യർ ആണ് ചിത്രത്തിലെ പ്രധാന കഥാപാത്രത്തെ അവതരിപ്പിക്കുന്നത്. ഇപ്പോൾ ചിത്രവുമായി ബന്ധപ്പെട്ട് പുറത്തുവരുന്ന വാർത്തയാണ് സിനിമാ മേഖലയിലെയും ആരാധകരുടെയും പ്രധാന ചർച്ചാ വിഷയം.
ചിത്രത്തിന് ‘എ’ സർട്ടിഫിക്കറ്റ് ലഭിച്ചെന്ന വാർത്തയാണ് മഞ്ജു വാര്യർ ഇപ്പോൾ പങ്കുവെച്ചിരിക്കുന്നത്. ‘സെൻസേഡ് വിത്ത്’ എന്നെഴുതിയതിന് ശേഷം ‘എ’ ആകൃതിയിലുള്ള ഒരു മരക്കൊമ്പുള്ള പോസ്‌റ്ററാണ് താരം പങ്കുവെച്ചത്. മരക്കൊമ്പിൽ പിടിച്ചുനിൽക്കുന്ന മഞ്ജുവിന്റെ ചിത്രങ്ങൾ അധികംവൈകാതെ വൈറലാകുകയും ചെയ്തു. ഇതോടെ ചിത്രത്തിൽ താരത്തിന്റെ കഥാപാത്രം എന്താണെന്ന ചർച്ചകളാണ് ആരാധകർക്കിടയിൽ ചൂടുപിടിക്കുന്നത്.
സിനിമയുടെ ഫസ്റ്റ് ലുക്ക് പോസ്‌റ്റർ ഉൾപ്പെടെയുള്ളവ ഇതിനോടകം ചർച്ചയായിരുന്നു. ചിത്രത്തിൽ വിശാഖ് നായരും ഗായത്രി അശോകുമാണ് മഞ്ജുവിനൊപ്പം പ്രധാന കഥാപാത്രങ്ങളെ അവതരിപ്പിക്കുന്നത്. ഓഗസ്റ്റ് 2-നാണ് ചിത്രം പുറത്തിറങ്ങുന്നത്.
