പുതുവർഷത്തിലും നിറഞ്ഞാടാനുറച്ച് മലയാളികളുടെ പ്രിയതാരം മമ്മൂട്ടി. ‘ഭ്രമയുഗ’ത്തിന്റെ അതിഗംഭീര പോസ്‌റ്ററാണ് പുതുവർഷത്തിൽ പുറത്തുവന്നിരിക്കുന്നത്. സാധാരണ സിനിമകളിൽ നിന്നും വേറിട്ട് ഭയാനകമായ ലുക്കിലുള്ള ഭ്രമയുഗത്തിന്റെ മറ്റ് പോസ്‌റ്ററുകളും ഇതിനോടകം ജനശ്രദ്ധ നേടിയിരുന്നു.
പ്രത്യേകതരം കിരീടം ധരിച്ച് ശാന്തഭാവത്തിലിരിക്കുന്ന മമ്മൂട്ടിയാണ് പോസ്റ്ററിലുള്ളത്. ഭൂതകാലം എന്ന ഹൊറർ ചിത്രത്തിലൂടെ ശ്രദ്ധേയനായ രാഹുൽ സദാശിവനാണ് ഭ്രമയുഗം സംവിധാനം ചെയ്യുന്നത്. കൊച്ചിയും ഒറ്റപ്പാലവുമാണ് ചിത്രത്തിന്റെ പ്രധാന ലൊക്കേഷനുകൾ. അർജുൻ അശോകൻ, സിദ്ധാർഥ് ഭരതൻ, അമൽദലിസ് എന്നിവരും ചിത്രത്തിൽ വേഷമിടുന്നുണ്ട്. മലയാളം, തമിഴ്, തെലുങ്ക്, കന്നഡ, ഹിന്ദി ഭാഷകളിലായാണ് ഭ്രമയുഗം റിലീസ് ചെയ്യുന്നത്.
വൈ നോട്ട് സ്റ്റുഡിയോസും നൈറ്റ് ഷിഫ്റ്റ് സ്റ്റുഡിയോസും ചേർന്ന് ആദ്യമായി നിർമ്മിക്കുന്ന മലയാള ചിത്രം കൂടിയാണിത്. ഹൊറർ ത്രില്ലർ സിനിമകൾക്ക് വേണ്ടി മാത്രമായി ആരംഭിച്ചിരിക്കുന്ന പ്രൊഡക്ഷൻ ഹൗസാണ് നൈറ്റ് ഷിഫ്റ്റ് സ്‌റ്റുഡിയോസ് എന്നതിനാൽ ചിത്രത്തിനായി പ്രേക്ഷകർ ആവേശത്തിലാണ് കാത്തിരിക്കുന്നത്.
