മണിപ്പുരിൽ രണ്ട് സ്ത്രീകളെ നഗ്നരാക്കി നടത്തിയ മനുഷ്യത്വ രഹിതമായ സംഭവത്തിന്റെ പശ്ചാത്തലത്തിൽ പ്രതികരണവുമായി ബോളിവുഡ് താരങ്ങൾ. അക്ഷയ് കുമാർ, കിയാര അദ്വാനി, റിച്ച ചദ്ദ എന്നീ താരങ്ങളാണ് സമൂഹ മാധ്യമങ്ങളിലൂടെ പ്രതികരണവുമായി രംഗത്ത് എത്തിയത്. ഭീകരമായ സംഭവമാണ് മണിപ്പൂരിൽ ഉണ്ടായിരിക്കുന്നതെന്ന് താരങ്ങൾ കുറിച്ചു.
സ്ത്രീകൾക്കെതിരായ ഈ അതിക്രമങ്ങളുടെ വീഡിയോ കണ്ട് ഞെട്ടി പോയെന്നും അറപ്പ് ഉളവാക്കിയെന്നും അക്ഷയ് കുമാർ കുറിച്ചു. ഇനിയൊരിക്കലും ഇതുപോലൊരു ഭയാനകമായ കാര്യം ചെയ്യാൻ ചിന്തിക്കാൻ തോന്നാത്ത തരത്തിലുള്ള കഠിനമായ ശിക്ഷ ആ കുറ്റവാളികൾക്ക് ലഭിക്കുമെന്ന് പ്രതീക്ഷിക്കുന്നതായും താരം പ്രതികരിച്ചു.
അതേസമയം ഈ വീഡിയോ വളരെ ഭയാനകമായിരുന്നെന്നും നടുങ്ങിപ്പോയെന്നും നടി കിയാര അദ്വാനിയും റിച്ച ചദ്ദയും പറഞ്ഞു. അപമാനിക്കപെടുകയും അതിക്രമം നേരിടുകയും ചെയ്ത സ്ത്രീകൾക്ക് എത്രയും പെട്ടെന്ന് നീതി ലഭിക്കാൻ പ്രാർഥിക്കുന്നുവെന്നും താരങ്ങൾ കുറിച്ചു. ഉത്തരവാദികൾ അവർ അർഹിക്കുന്ന ഏറ്റവും കഠിനമായ ശിക്ഷ അനുഭവിക്കണമെന്നും ഇരുവരും കുറിച്ചു.
