മലയാള സിനിമയിലെ നിറസാന്നിധ്യമായിരുന്ന കനകലതയുടെ വേർപാടിൽ വേദനിക്കുകയാണ് സിനിമാ ലോകം. നിരവധി താരങ്ങളാണ് കനകലതയ്ക്ക് ആദരാഞ്ജലി അർപ്പിക്കുന്നത്. താരത്തെ അനുസ്മരിക്കുകയാണ് ഡബ്ബിങ് ആർട്ടിസ്റ്റും നടിയുമായ ഭാഗ്യലക്ഷ്മി. വയ്യാതിരിക്കുകയാണെന്ന് അറിഞ്ഞിട്ടും അന്വേഷിക്കാനോ കാണാൻ പോകാനോ സാധിച്ചില്ലെന്നും ഒരു സോറി പോലും പറയാൻ പറ്റിയില്ലെന്നുമാണ് ഭാഗ്യലക്ഷ്മി സാമൂഹ്യമാധ്യമത്തിൽ കുറിച്ചത്.
“നമ്മൾ എപ്പോഴും വിചാരിക്കും ഇവരെ കണ്ടിട്ട് കുറേ വർഷമായല്ലോ. നാളെ വിളിക്കാം അല്ലെങ്കിൽ പോയി കാണാം എന്ന്, അങ്ങനെ ആ നാളെ നീണ്ടു നീണ്ട് ഒടുവിൽ അവർ അന്തരിച്ചു എന്ന വാർത്ത കേൾക്കുമ്പോൾ ഉള്ളിൽ കുറ്റബോധം തോന്നും. കനകലതയുടെ കാര്യത്തിൽ ഞാൻ അങ്ങനെ ചിന്തിച്ചു. പലപ്പോഴും വിചാരിച്ചിരുന്നു വിളിക്കണം അന്വേഷിക്കണം എന്നൊക്കെ.
ഇത്രയും വയ്യാതിരുന്നിട്ടും അറിഞ്ഞില്ല അന്വേഷിച്ചില്ല, പോയി കാണാൻ തോന്നിയില്ലല്ലോ. ഇനി ഒരിക്കലും കാണാൻ പറ്റില്ല. ഒരു സോറി പോലും പറയാൻ പറ്റിയില്ല. വലിയ സൗഹൃദമൊന്നും ഇല്ലെങ്കിലും കാണുമ്പോൾ വളരെ സ്നേഹത്തോടെ സംസാരിച്ചിരുന്നു, സങ്കടങ്ങൾ പങ്കുവെച്ചിരുന്നു. ഓരോ മരണവും ഓരോ ഓർമ്മപ്പെടുത്തലാണ്. സ്‌മരണാഞ്ജലികൾ” എന്നാണ് ഭാഗ്യലക്ഷ്മി കുറിച്ചത്. കൂടാതെ കനകലതയ്ക്ക് അന്ത്യാഞ്ജലി അർപ്പിക്കാൻ തിരുവനന്തപുരത്തെ വസതിയിൽ ഭാഗ്യലക്ഷ്മി എത്തിയിരുന്നു.
