സാമൂഹ്യ മാധ്യമങ്ങളിൽ വളരെയധികം ട്രെന്റിങ്ങായി മുന്നേറുന്നതാണ് സിനിമാ താരങ്ങളുടെ കമന്റ് ആവശ്യപ്പെട്ടുകൊണ്ടുള്ള വീഡിയോകൾ. തങ്ങളുടെ പ്രിയപ്പെട്ട താരങ്ങൾ കമന്റ് ചെയ്താൽ മാത്രമേ പഠിക്കൂ എന്ന വിധത്തിൽ പ്രത്യക്ഷപ്പെടുന്ന വീഡിയോകൾക്ക് പല താരങ്ങളും മറുപടിയും നൽകാറുണ്ട്. ഇപ്പോൾ ഇത്തരത്തിൽ ബേസിൽ ജോസഫിന്റെ മറുപടി ആവശ്യപ്പെട്ടുകൊണ്ടുള്ള വീ‍ഡിയോയാണ് തരംഗമായിരിക്കുന്നത്.
ബേസിൽ ജോസഫ് കമൻ്റ് ചെയ്താൽ നാട്ടിൽ വരാം എന്ന വീഡിയോയുമായാണ് കാനഡയിലുള്ള ഒരു യുവാവ് രംഗത്തെത്തിയിരിക്കുന്നത്. “ബേസിൽ ജോസഫ് ഈ വീഡിയോയിൽ കമൻ്റിട്ടാൽ ഞാൻ ഇന്ത്യയിലേയ്ക്കുള്ള വിമാനടിക്കറ്റ് ബുക്ക് ചെയ്യും. കാനഡയിൽ വന്നിട്ട് ആറ് വർഷമായി. ഒരു തിരിച്ചുവിളിക്കായി ഞാൻ കാത്തിരിക്കുന്നു” എന്ന കുറിപ്പോടെ കോട്ടയം സ്വദേശിയായ ഒരു യുവാവാണ് വീഡിയോ പോസ്റ്റ് ചെയ്തിരിക്കുന്നത്. മോട്ടി ലാൽ എന്ന ഇൻസ്‌റ്റാഗ്രാം പേജിൽ നിന്നാണ് വീഡിയോ പങ്കുവെച്ചത്.
സംഭവം വൈറലായതോടെ ഈ വിവരം ബേസിലിൻ്റെ കാതിലുമെത്തി. ഇതോടെ “മകനേ മടങ്ങി വരൂ” എന്നാണ് വീഡിയോയ്ക്ക് കമന്റായി താരം കുറിച്ചത്. ഇതോടെ താരത്തിന്റെ കമന്റും വീഡിയോയും സമൂഹമാധ്യമങ്ങളിൽ ചർച്ചയായി മാറുകയും ചെയ്തു. നിരവധി പേരാണ് അതിരസകരമായ കമന്റുകൾ കൊണ്ട് യുവാവിനെ പൊതിയുന്നത്. ഇത്തരത്തിൽ മഞ്ഞുമ്മൽ ബോയ്സ് ടീമിന്റെയും ടൊവിനോ തോമസിന്റെയും വിജയ് ദേവരകൊണ്ടയുടെയുമെല്ലാം കമന്റ് അഭ്യർത്ഥിച്ച് നിരവധി പേർ വീഡിയോ പങ്കുവെച്ചിരുന്നു. താരങ്ങൾ അവയ്ക്ക് കമന്റും നൽകിയിരുന്നു.
