മലയാളികൾ ഏറെ ഇഷ്ടപ്പെടുന്ന താരമാണ് ബാല. അപകടകരമായ അവസ്ഥയിൽ നിന്നും കരള്‍ മാറ്റിവയ്ക്കല്‍ ശസ്ത്രക്രിയക്ക് ശേഷം ജീവിതത്തിലേക്ക് തിരിച്ചുവരികയാണ് ബാല. സോഷ്യല്‍മീഡിയയില്‍ സജീവമായ താരം ഇപ്പോൾ തന്റെ പുതിയൊരു വീഡിയോയാണ് ആരാധകരുമായി പങ്കുവെച്ചിരിക്കുന്നത്. കരള്‍ മാറ്റിവയ്ക്കല്‍ ശസ്ത്രക്രിയ കഴിഞ്ഞ് 57 ദിവസം പിന്നിടുമ്പോൾ 58-ാം ദിവസം ജിമ്മില്‍ വര്‍ക്കൗട്ട് ചെയ്യുന്ന ഒരു വീഡിയോ ആണ് താരം പങ്കുവച്ചിരിക്കുന്നത്.
”ഇത് കഠിനവും അസാധ്യവും വേദന നിറഞ്ഞതുമാണ്. പക്ഷെ എനിക്ക് വിട്ടുകൊടുക്കാനാവില്ല. ഒരിക്കലും തോറ്റുകൊടുക്കില്ല. വലിയൊരു ശസ്ത്രക്രിയ കഴിഞ്ഞിട്ട് 58 ദിവസം. ദൈവാനുഗ്രഹം” എന്ന അടിക്കുറിപ്പോടെയാണ് ബാല വീഡിയോ പങ്കുവച്ചിരിക്കുന്നത്. യഥാര്‍ത്ഥ പോരാളി എന്ന് വിശേഷിപ്പിച്ച് നിരവധി പേരാണ് താരത്തെ അഭിനന്ദിച്ചുകൊണ്ട് രംഗത്തെത്തിയിരിക്കുന്നത്. എന്നാല്‍ ഇത്ര പെട്ടെന്ന് വ്യായാമം വേണമായിരുന്നോ എന്നും ആരാധകര്‍ ചോദിക്കുന്നുണ്ട്.
ബാലയുടെ പോസ്റ്റിന്റെ പൂർണ്ണരൂപം:
“പേജില്‍ വന്ന് സംസാരിച്ചിട്ട് രണ്ട് മാസമായി. എല്ലാവരുടെയും ആത്മാര്‍ത്ഥമായ പ്രാര്‍ത്ഥനകള്‍ കൊണ്ടും ദൈവത്തിന്‍റെ അനുഗ്രഹം കൊണ്ടും വീണ്ടും ഒരു പുതിയ ജീവിതം മുന്നോട്ടുപോവുന്നു. എല്ലാവരോടും നന്ദി പറയുന്നു.
ജീവിതത്തിൽ ജയിക്കാൻ പറ്റാത്ത ഒരേ ഒരു കാര്യമുണ്ട്. എന്നെ സംബന്ധിച്ച് അത് സ്നേഹമാണ്. എന്നെ ഇത്രയും പേര് സ്നേഹിക്കുന്നുവെന്ന് ഞാൻ അറിഞ്ഞത് എന്‍റെ ജന്മദിനത്തിലാണ്(മെയ് നാലിന്). എന്നെ സ്നേഹിക്കുന്ന ലക്ഷക്കണക്കിനാളുകൾ ഉണ്ടെന്ന് അന്ന് ഞാൻ അറിഞ്ഞു. ആ സ്നേഹത്തിന് എല്ലാവർക്കും നന്ദി. സമയം എന്നത് വലിയൊരു ഘടകമാണ്. ഏത് സമയത്തും നമുക്ക് എന്തുവേണമെങ്കിലും സംഭവിക്കാം. അത് കോടീശ്വരനായാലും ഭിക്ഷക്കാരനായാലും. ഒരു നിമിഷം മതി ജീവിതം മാറിമറിഞ്ഞുപോകാൻ. എന്നിരുന്നാലും അതിന് മുകളിൽ ഒന്നുണ്ട്, ദൈവത്തിന്‍റെ അനുഗ്രഹം.
ഒരുപാട് കുട്ടികൾ എനിക്ക് വേണ്ടി പ്രാർത്ഥിച്ചു. അവിടെ ജാതിയും മതവും ഒന്നുമില്ല. മുസ്‍ലിം കുട്ടികള്‍, ക്രിസ്ത്യാനികള്‍, ഹിന്ദുക്കള്‍… എല്ലാവരും എനിക്ക് വേണ്ടി പ്രാര്‍ത്ഥിച്ചു. ഇതിനൊക്കെ എങ്ങനെ നന്ദി പറയണമെന്നെനിക്കറിയില്ല. ഈ വീഡിയോയിലൂടെ എല്ലാവരോടും നന്ദി പറയുന്നു. ഇനി നല്ല രീതിയിൽ മുന്നോട്ട് പോകണം. നല്ല പടങ്ങൾ ചെയ്യണം. കുറേ സർപ്രൈസുകളുണ്ട്. അടുത്ത് തന്നെ സിനിമയിൽ കാണാൻ പറ്റും. അടിച്ചുപൊളിക്കാം. ജയിക്കാം. നന്മയുടെ പാതയിൽ നമുക്ക് മുന്നോട്ട് പോകാം….” ബാല കുറിച്ചു.
