അഭിനയത്തിൽ മാത്രമല്ല ഗായകനായും തനിക്ക് തിളങ്ങാൻ സാധിക്കുമെന്ന് ഒരിക്കൽകൂടി തെളിയിച്ചിരിക്കുകയാണ് മലയാളികളുടെ പ്രിയതാരം അർജുൻ അശോകൻ. മമ്മൂട്ടി നായകനായെത്തുന്ന ‘ടർബോ ജോസി’ലെ മാസ് ഗാനത്തിലൂടെയാണ് അർജുൻ പിന്നണി ഗാനരംഗത്തേയ്ക്ക് ചുവടുവയ്ക്കുന്നത്. സംഗീത സംവിധായകനായ ക്രിസ്റ്റോ സേവ്യറാണ് ഇക്കാര്യം തൻ്റെ ഇൻസ്റ്റഗ്രാം അക്കൗണ്ടിലൂടെ പുറത്തുവിട്ടിരിക്കുന്നത്.
മിഥുൻ മാനുവൽ തോമസ് തിരക്കഥയെഴുതി വൈശാഖ് സംവിധാനം ചെയ്യുന്ന ചിത്രത്തിന്റെ ട്രെയിലർ കഴിഞ്ഞദിവസം പുറത്തുവന്നിരുന്നു. ട്രെയിലറിനൊപ്പമാണ് അർജുൻ അശോകൻ ആലപിച്ച ഗാനമുള്ളത്. ട്രെയിലറിൽ കേൾക്കുന്ന അതേ ഭാഗം അർജുൻ അശോകൻ സ്റ്റുഡിയോയിൽ പാടുന്ന വീഡിയോയും ക്രിസ്റ്റോ പങ്കുവെച്ചിട്ടുണ്ട്. സംഗീത സംവിധായകനേയും വീഡിയോയിൽ കാണാൻ സാധിക്കും. സിംഗർ അർജുൻ അശോകൻ എന്ന തലക്കെട്ടോടെയാണ് വീഡിയോ പോസ്റ്റ് ചെയ്‌തിരിക്കുന്നത്. അർജുൻ വീഡിയോക്ക് നന്ദിയറിയിച്ച് കമൻ്റും ചെയ്തിട്ടുണ്ട്.
സിനിമാ പ്രേമികൾ വളരെ പ്രതീക്ഷയോടെ കാത്തിരിക്കുന്ന മമ്മൂട്ടിയുടെ ടർബോ ജോസ് റിലീസിന് മുമ്പേ തന്നെ ഏറെ ശ്രദ്ധ നേടിയിട്ടുണ്ട്. മിഥുൻ മാനുവൽ തോമസ് എഴുതി വൈശാഖ് സംവിധാനം ചെയ്യുന്ന ചിത്രത്തിന്റെ ട്രെയിലർ അടുത്തിടെ പുറത്തിറക്കിയിരുന്നു. വമ്പൻ ആക്ഷൻ രംഗങ്ങളും മമ്മൂട്ടിയുടെ സ്റ്റൈലിഷ് ലുക്കും കൊണ്ട് സമ്പന്നമായിരുന്നു ടർബോയുടെ ട്രെയിലർ. മമ്മൂട്ടി കമ്പനിയുടെ ബാനറിൽ നിർമ്മിക്കുന്ന അഞ്ചാമത്തെ സിനിമയാണ് ടർബോ. ജീപ്പ് ഡ്രൈവറായ ജോസിൻ്റെ കഥയാണ് ചിത്രം പറയുന്നത്.
