ഫുട്ബോൾ പ്രേമികളുടെ ഇഷ്ട താരമാണ് ലയണൽ മെസ്സി. ലോകത്തിൽ ഏറ്റവും കൂടുതൽ മെസ്സിയെയും അർജന്റീന ഫുട്ബോൾ ടീമിനെയും ഇഷ്ടപ്പെടുന്നത് ഒരുപക്ഷെ മലയാളികൾ ആയിരിക്കും. മലയാളി ആരാധകരെ തിരിച്ചും സ്നേഹിക്കുന്ന ഒരു താരം കൂടിയാണ് മെസ്സി. 2022-ലെ ലോകകപ്പ് വിജയത്തിനു പിന്നാലെ അര്‍ജന്റീന ഫുട്ബോള് അസോസിയേഷന്‍ കേരളത്തെയടക്കം പരാമര്‍ശിച്ചുകൊണ്ട് നന്ദി അറിയിച്ചുകൊണ്ട് എത്തുകയും ചെയ്തിരുന്നു. ലോകകപ്പ് ജേതാക്കളായ അര്‍ജന്റീന ഫുട്ബോള് ടീം കേരളത്തില്‍ കളിക്കാനെത്തുന്നു എന്ന വാർത്ത മലയാളി ആരാധകരെ ഏറെ ആവേശത്തിലാഴ്ത്തിയിരിക്കുകയാണ് ഇപ്പോൾ. 2025 ഒക്ടോബർ മാസത്തിലാണ് മെസ്സിയും സംഘവും കേരളത്തിൽ ഫുട്ബോൾ കളിക്കാനെത്തുക.
രണ്ട് സൗഹൃദ മത്സരങ്ങളാണ് കളിക്കുക. അർജന്റീന ഫുട്ബോൾ അസോസിയേഷൻ പ്രതിനിധികളുമായി കായിക മന്ത്രി ഓൺലൈനായി ചർച്ച നടത്തിയിട്ടുണ്ട്. കേരളത്തിൽ കളിക്കാൻ സന്നദ്ധത അറിയിച്ചുകൊണ്ടുള്ള അര്‍ജന്റീന ഫുട്ബോള് അസോസിയേഷന്റെ ഇ മെയില്‍ ലഭിച്ചതായി സംസ്ഥാന കായിക മന്ത്രി വി. അബ്ദുറഹ്‌മാന്‍ നേരത്തേ തന്നെ അറിയിച്ചിരുന്നു. ഈ വർഷം ജൂണിൽ അർജന്റീന ഫുട്ബോൾ ടീം കേരളത്തിലെത്തുമെന്നാണ് ആദ്യം അറിയിച്ചിരുന്നത്. എന്നാൽ മഴക്കാലമായതിനാൽ അർജന്റീന പ്രയാസം അറിയിച്ചു. ഇതിനെ തുടർന്നാണ് അടുത്ത വർഷത്തേക്ക് രണ്ട് സൗഹൃദ മത്സരങ്ങൾ മാറ്റി വച്ചത്.
അതേസമയം നേരത്തേ സൗഹൃദമത്സരം കളിക്കാനുള്ള അര്‍ജന്റീനയുടെ ക്ഷണം ഇന്ത്യന്‍ ഫുട്ബോള് അസോസിയേഷന്‍ നിരസിച്ചിരുന്നു. മത്സരത്തിന് ആതിഥേയത്വം വഹിക്കാനുള്ള ഉയര്‍ന്ന ചെലവായിരുന്നു എ.ഐ.എഫ്.എഫിന്റെ പിന്മാറ്റത്തിന് കാരണമായി പറഞ്ഞിരുന്നത്. ഇതോടെ അര്‍ജന്റീനാ ടീമിനെ കേരളത്തിലേക്ക് സ്വാഗതം ചെയ്തുകൊണ്ട് സൗഹൃദ മത്സരം കളിക്കുന്നതിന് വേണ്ടി കായിക മന്ത്രി തന്നെ രംഗത്ത് എത്തി. കൂടാതെ അര്‍ജന്റീന ഫുട്ബോള് അസോസിയേഷന്‍ പ്രസിഡന്റ് ക്ലോഡിയോ ടാപിയക്ക് മന്ത്രി കത്തയക്കുകയും ചെയ്തിരുന്നു.
