സംഗീതം കൊണ്ട് വിസ്മയം തീർക്കുന്ന മാന്ത്രികൻ സാധാരണക്കാർക്കിടയിലേക്ക് പൊടുന്നനെ കയറി വന്നു. കൊച്ചി മെട്രോ യാത്രക്കാർ സ്തംഭിച്ചു നിന്ന നിമിഷം. സ്റ്റേഷനിൽ നിർത്തിയ മെട്രോ ട്രെയിനിലേക്ക് ആദ്യം ബോഡിഗാർഡുകൾ കയറി വന്നു, പിന്നാലെ ഒട്ടും പ്രതീക്ഷിക്കാതെ കയറിവന്ന ആളെക്കണ്ട് യാത്രക്കാർ വാ പൊളിച്ചു നിന്നുപോയി. സാക്ഷാൽ ഇസൈ പുയൽ എ. ആർ. റഹ്മാൻ. മെട്രോയിൽ കയറിയ അദ്ദേഹം ആരാധകർക്കൊപ്പം സെൽഫിയെടുക്കുക കൂടി ചെയ്തപ്പോൾ മെട്രോയും യാത്രക്കാരും സംപ്രിപ്തരായി.
‘ആടുജീവിതം’ എന്ന ചിത്രത്തിന്റെ വെബ്സൈറ്റ് ലോഞ്ചിനായി കൊച്ചിയിലെത്തിയ വേളയിലാണ് റഹ്മാനും സംവിധായകൻ ബ്ലെസിയും ചിത്രത്തിന്റെ അണിയറപ്രവർത്തകരും ചേർന്ന് കൊച്ചി മെട്രോയിൽ സർപ്രൈസ് സമ്മാനിച്ചത്. കൂടെ സെൽഫി എടുക്കാൻ താല്പര്യം പ്രകടിപ്പിച്ച ആരാധകർക്കൊപ്പം സെൽഫി എടുക്കാനും റഹ്മാൻ മടി കാണിച്ചില്ല. മാർച്ച്‌ 10-ന് അങ്കമാലി ആഡ്ലക്സ് കൺവെൻഷൻ സെന്ററിൽ വച്ച് ചിത്രത്തിന്റെ ഓഡിയോ ലോഞ്ച് നടക്കുമെന്ന് റഹ്മാൻ നേരത്തെ തന്നെ വെബ്സൈറ്റ് ലോഞ്ച് വേളയിൽ അറിയിച്ചിരുന്നു. മാർച്ച്‌ 28-നാണ് പ്രേക്ഷകർ കാത്തിരിക്കുന്ന ആടുജീവിതം ബിഗ് സ്ക്രീനിൽ എത്തുക.
മലയാളത്തിൽ ഇന്നും ബെസ്റ്റ്‌സെല്ലറുകളിൽ ഒന്നായ ബെന്യമിന്റെ ‘ആടുജീവിതം’ നോവലിനെ അടിസ്ഥാനമാക്കി ബ്ലെസി സംവിധാനം ചെയ്യുന്ന ചിത്രത്തിൽ നജീബ് എന്ന നായകകഥാപാത്രമായി എത്തുന്നത് പൃഥ്വിരാജാണ്. കഥാപാത്രത്തിന് വേണ്ടി താരം നടത്തിയ മേക്കോവർ ഏറെ ചർച്ചയാവുകയും ചെയ്തിരുന്നു. 2008 ൽ പ്രാരംഭ വർക്കുകൾ ആരംഭിച്ച ആടുജീവിതം വർഷങ്ങളുടെ തയ്യാറെടുപ്പുകൾക്കൊടുവിൽ 2018 ലായിരുന്നു ചിത്രീകരണം ആരംഭിച്ചത്. ഏറ്റവുമധികം നാളുകൾ നീണ്ടുപോയ ചിത്രത്തിന്റെ ഷൂട്ടിംഗ് കഴിഞ്ഞ വർഷം ജൂലൈ 14നാണ് പൂർത്തിയായത്. ജോർദാനിലായിരുന്നു ചിത്രത്തിന്റെ മുഖ്യ പങ്കും ഷൂട്ട് ചെയ്തിരിക്കുന്നത്.
പൃഥ്വിരാജിന്റെ കരിയറിലെ തന്നെ ഏറ്റവും വലിയ സിനിമയാണ് ‘ആടുജീവിതം’. ഓസ്‌കാർ അവാർഡ് ജേതാക്കളായ എ ആർ റഹ്മാൻ സംഗീതവും റസൂൽ പൂക്കുട്ടി ശബ്ദമിശ്രണവും നിർവഹിക്കുന്ന ചിത്രത്തിൽ പൃഥ്വിരാജിന്റെ നായികയായെത്തുന്നത് തെന്നിന്ത്യൻ താരം അമല പോളാണ്. വിഷ്വൽ റൊമാൻസിന്റെ ബാനറിലാണ് ചിത്രം തിയറ്ററുകളിൽ എത്തുന്നത്. ജിമ്മി ജീൻ ലൂയിസ് (ഹോളിവുഡ് നടൻ), കെ ആർ ഗോകുൽ, പ്രശസ്ത അറബ് അഭിനേതാക്കളായ താലിബ് അൽ ബലൂഷി, റിക്കബി എന്നിവരാണ് ചിത്രത്തിലെ മറ്റുപ്രധാന കഥാപാത്രങ്ങളെ അവതരിപ്പിക്കുന്നത്. മലയാളത്തിന് പുറമേ ഹിന്ദി, തമിഴ്, തെലുങ്ക്, കന്നഡ എന്നീ ഭാഷകളിലും ചിത്രം ഒരുങ്ങുന്നുണ്ട്. സുനിൽ കെ.എസ് ആണ് ഛായാഗ്രഹണം നിർവഹിക്കുന്നത്, എഡിറ്റിംഗ് ശ്രീകർ പ്രസാദ്.
