കേരളത്തെ ഒന്നാകെ നടുക്കിയ ഒരു കൊലപാതകം. അതിന് പിന്നിലെ ദുരൂഹതകൾ തെളിയിക്കാൻ ശ്രമിക്കുന്ന പോലീസ് സംഘം. നിഗൂഢതകൾ ഒളിപ്പിച്ചു വച്ച് മലയാളത്തില്‍ പുതുമയുള്ളൊരു കുറ്റാന്വേഷണ ചിത്രം കൂടി വെള്ളിത്തിരയിൽ എത്തുന്നു. ടൊവിനോ ചിത്രം ‘അന്വേഷിപ്പിന്‍ കണ്ടെത്തും’ ട്രെയിലര്‍ പുറത്തിറങ്ങി. പോലീസ് കഥാപാത്രമായി ഇതുവരെ കാണാത്ത ലുക്കിലാണ് ചിത്രത്തില്‍ ടൊവിനോ എത്തുന്നത്. ഹൈറേഞ്ചിന്റെ പശ്ചാത്തലത്തില്‍ ഒരു ഇമോഷണല്‍ ഇന്‍വെസ്റ്റിഗേഷന്‍ ഡ്രാമയായായാണ് ചിത്രം ഒരുക്കിയിരിക്കുന്നത്. ഫെബ്രുവരി 9 നാണ് ചിത്രം തിയേറ്ററുകളിലെത്തുന്നത്.
ഡാര്‍വിന്‍ കുര്യാക്കോസ് സംവിധാനം ചെയ്യുന്ന ചിത്രം തീയറ്റര്‍ ഓഫ് ഡ്രീംസിന്റെ ബാനറില്‍ ഡോള്‍വിന്‍ കുര്യാക്കോസ്, വിക്രം മെഹ്‌റ, ജിനു വി. എബ്രാഹാം, സിദ്ധാര്‍ഥ് ആനന്ദ് കുമാര്‍ എന്നിവര്‍ ചേര്‍ന്നാണ് നിര്‍മ്മിക്കുന്നത്. ജിനു വി എബ്രാഹാമാണ് ചിത്രത്തിന്റെ തിരക്കഥ ഒരുക്കിയിരിക്കുന്നത്. പൃഥ്വിരാജ് നായകനായെത്തിയ ‘കാപ്പ’യുടെ മികച്ച വിജയത്തിനു ശേഷം തീയേറ്റര്‍ ഓഫ് ഡ്രീംസ് നിര്‍മ്മിക്കുന്ന ചിത്രമാണ് ‘അന്വേഷിപ്പിന്‍ കണ്ടെത്തും’. സിനിമയുടെ സംഗീതമൊരുക്കുന്നത് തെന്നിന്ത്യയിലെ ശ്രദ്ധേയനായ സംഗീത സംവിധായകന്‍ സന്തോഷ് നാരായണനാണ്.
വന്‍ താരനിരയും സംഭവ ബഹുലങ്ങളായ മുഹൂര്‍ത്തങ്ങളും കോര്‍ത്തിണക്കിക്കൊണ്ട് വിശാലമായ ഒരു ക്യാന്‍വാസിലാണ് സിനിമ എത്തുന്നത്. ചിത്രത്തില്‍ ടൊവിനോയ്ക്ക് പുറമെ ഇന്ദ്രന്‍സ്, സിദ്ദിഖ്, ഷമ്മി തിലകന്‍ ബാബുരാജ്, പ്രമോദ് വെളിയനാട്, വിനീത് തട്ടില്‍, വെട്ടുകിളി പ്രകാശ്, രമ്യാ സുവി (നന്‍ പകല്‍ മയക്കം ഫെയിം) എന്നിവരും പ്രധാന താരങ്ങളായെത്തുന്നുണ്ട്. അതേസമയം ചിത്രത്തിലെ രണ്ടു നായികമാരും പുതുമുഖങ്ങളാണ്.
‘തങ്കം’ സിനിമയുടെ ക്യാമറമാനായിരുന്ന ഗൗതം ശങ്കറാണ് ഛായാഗ്രഹണം നിർവഹിക്കുന്നത്. എഡിറ്റിംഗ്: സൈജു ശ്രീധര്‍, കലാ സംവിധാനം: ദിലീപ് നാഥ്, കോസ്റ്റ്യും ഡിസൈന്‍: സമീറ സനീഷ്, മേക്കപ്പ്: സജീ കാട്ടാക്കട, പ്രൊഡക്ഷന്‍ കണ്‍ട്രോളര്‍: സഞ്ജു ജെ, പി ആര്‍ ഒ: ശബരി, വിഷ്വല്‍ പ്രൊമോഷന്‍സ്: സ്‌നേക്ക്പ്ലാന്റ്.
