തൃഷ ആദ്യമായി മലയാളത്തിൽ അഭിനയിച്ച ചിത്രമായിരുന്നു ‘ഹേയ് ജൂഡ്’. ശ്യാമപ്രസാദ് സംവിധാനം ചെയ്ത ചിത്രം തിയറ്ററില്‍ വലിയ പരാജയമായിരുന്നു. നിവിൻ പോളി ആയിരുന്നു ചിത്രത്തിലെ നായകൻ. ഇപ്പോഴിതാ നിവിനെതിരെ കടുത്ത വിമർശനവുമായി രംഗത്ത് എത്തിയിരിക്കുകയാണ് ചിത്രത്തിന്റെ നിർമാതാവായ അനിൽ അമ്പാലക്കര. സിനിമയുടെ സാമ്പത്തിക നഷ്ടത്തെക്കുറിച്ച് പ്രമുഖ യൂട്യൂബ് ചാനലിൽ സംസാരിക്കവെയാണ് നിവിൻ പോളിക്കെതിരെ നിർമാതാവിന്റെ ഗുരുതര ആരോപണങ്ങൾ.
‘കാളിദാസ് ജയറാമിനെയാണ് സിനിമയിലെ നായക വേഷത്തിലേക്ക് ആദ്യം പരിഗണിച്ചിരുന്നത്. എന്നാൽ സിനിമയുടെ കഥ കേട്ടപ്പോൾ നിവിൻ പോളിക്ക് ഇഷ്ടമായി. സാറ്റ്ലൈറ്റ് മൂല്യവും മറ്റും പരിഗണിച്ച് നിവിൻ പോളിയെ നായകനാക്കുകയും ചെയ്തു. 25 ലക്ഷത്തിന്‍റെ ചെക്ക് അഡ്വാൻസായി നൽകി. പ്രതിഫലക്കാര്യം ശ്യാമപ്രസാദിനോട് ചോദിച്ചപ്പോൾ പറഞ്ഞ് ശരിയാക്കാം, പക്കാ കൊമേഴ്ഷ്യൽ സിനിമയല്ലല്ലോ എന്ന് പറയുകയും ചെയ്തു.
എന്നാൽ ഷൂട്ടിംഗ് തുടങ്ങാനിരിക്കുമ്പോൾ നിവിന്‍റെ എഗ്രിമെന്‍റ് വാങ്ങിക്കാൻ പ്രൊഡക്ഷൻ കൺട്രോളർ പോയി. അപ്പോൾ ഒന്നരക്കോടി എന്നാണ് പ്രതിഫലമായി എഴുതിയത്. ശ്യാമപ്രസാദിനെ വിളിച്ചപ്പോൾ പിന്നീട് സംസാരിച്ച് ക്ലിയർ ചെയ്യാം എന്ന് പറയുകയും ചെയ്തു. അവസാനം ഇത് വലിയൊരു പ്രശ്നമായി മാറി. സിങ്ക് സൗണ്ട് ആയിരുന്നെങ്കിലും പാച്ച് ഡബ്ബിംഗിന് വിളിച്ചപ്പോൾ ബാക്കി തുക തരാതെ വരില്ലെന്ന് നിവിൻ പറഞ്ഞു. പ്രതിഫലം ആദ്യം പറയാതെ ഇത്രയും വലിയ തുക ആവശ്യപ്പെടുന്നത് എന്റെ പുതിയ അനുഭവമാണ്- അനിൽ പറഞ്ഞു.
അതേസമയം ഷൂട്ടിംഗ് തുടങ്ങിയപ്പോഴും ഇതുപോലെ പ്രശ്നങ്ങളുണ്ടായി. ഷൂട്ട് തുടങ്ങി ആറാമത്തെ ദിവസം നിവിൻ അവിടെ നിന്നും മുങ്ങി. കോഴിക്കോട് ഉദ്ഘാടനത്തിന് പോകണമെന്നായിരു പറഞ്ഞത്. തൃഷ ഷൂട്ടിന് വന്നിട്ടും ഇദ്ദേഹമില്ലാത്തത് കൊണ്ട് ഷൂട്ടിംഗ് നടന്നില്ല. ഇതെല്ലാം തലേദിവസമാണ് പറയുന്നത്. മാത്രമല്ല, ഗോവയിലെ ലൊക്കേഷനിൽ വന്നപ്പോൾ തൃഷ ഒരു ഹോട്ടലിൽ താമസം വേണമെന്ന് പറഞ്ഞിരുന്നു. അപ്പോൾ എനിക്കും അത്തരത്തിൽ ഹോട്ടൽ വേണമെന്ന് പറഞ്ഞ് നിവിനും മാറ്റി.
പിന്നീട് അമേരിക്കയിൽ മൂന്നാല് ദിവസത്തെ പരിപാടിയുണ്ടെന്ന് പറഞ്ഞു പോയി. ഇതൊക്കെ നേരത്തെ പറയണമായിരുന്നെന്ന് ഞാൻ പറഞ്ഞു. പ്രതീക്ഷിച്ചതിലും അധികം ഈ സിനിമക്കായി ചെലവായതും നിവിൻ കാരണമാണ് എന്നും അനിൽ പറഞ്ഞു. ഇതിനോടകം തന്നെ തമിഴിൽ നിവിൻ ചെയ്ത റിച്ചി എന്ന സിനിമ പരാജയപ്പെട്ടിരുന്നു. അത് ഈ സിനിമയെയും നന്നായി ബാധിച്ചു. ഫാൻസുകാരെ വിളിച്ചിട്ട് അവർ പോലും സഹകരിക്കാൻ തയ്യാറായില്ല. അതിന് മുൻപ് ഇറങ്ങിയ ‘ഞണ്ടുകളുടെ നാട്ടിൽ ഒരിടവേള’ എന്ന സിനിമയും വിജയിച്ചില്ല. ഹെയ് ജൂഡ് നല്ല സിനിമയായിരുന്നെങ്കിലും തിയേറ്ററിൽ ഓടിയില്ല. ഇത്നാ മൂലം ല് കോടി രൂപയുടെ നഷ്ടമാണ് ഉണ്ടായതെന്നും അനിൽ വെളിപ്പെടുത്തി.
