ആരാധകർ വളരെ ആകാംക്ഷയോടെ കാത്തിരിക്കുന്ന ചിത്രമാണ് അല്ലു അർജുന്റെ ‘പുഷ്പ 2; ദ റൂൾ’. സുകുമാർ സംവിധാനം ചെയ്യുന്ന ചിത്രത്തിൻ്റെ ടീസർ റിലീസ് പ്രഖ്യാപിച്ചിരിക്കുകയാണ് അണിയറ പ്രവർത്തകർ. അല്ലു അർജുൻ്റെ പിറന്നാൾ ദിവസമായ ഏപ്രിൽ എട്ടിനാണ് ടീസർ ജനങ്ങളിലേയ്ക്ക് എത്തുക. തുടർന്ന് ആഗസ്റ്റ് 15-ന് പുഷ്പ 2 ആഗോളതലത്തിൽ തിയേറ്ററിലെത്തും.
സിനിമയുടെ പുതിയ പോസ്റ്ററും അണിയറ പ്രവർത്തകർ പുറത്തുവിട്ടിട്ടുണ്ട്. പോസ്റ്ററിൽ നായകന്റെ ചിലങ്ക കെട്ടിയ കാൽ മാത്രമാണ് കാണാൻ സാധിക്കുന്നത്. കഴിഞ്ഞ ദിവസം ചിത്രത്തിന്റെ ഗ്ലിംപ്‌സ് വീഡിയോയും പുറത്തുവിട്ടിരുന്നു. യൂട്യൂബിലെ മികച്ച പ്രതികരണമായിരുന്നു വീഡിയോയ്ക്ക് ലഭിച്ചത്. സംവിധായകൻ സുകുമാറും മൈത്രി മൂവി മേക്കേർസും ചേർന്നാണ് പുഷ്പ 2 നിർമ്മിക്കുന്നത്.
2021ൽ പുറത്തിറങ്ങിയ ‘പുഷ്പ; ദ റൈസ്’ൽ പുഷ്പരാജായി എത്തിയ അല്ലു അർജുൻ കരിയറിലെ മികച്ച പ്രകടനമാണ് കാഴ്‌ചവെച്ചത്. ചിത്രത്തിലെ മാസ് ഡയലോഗുകളും ഗാനങ്ങളും സിനിമാപ്രേമികൾ വലിയരീതിയിൽ ആഘോഷമാക്കിയിരുന്നു. മലയാളത്തിൻ്റെ പ്രിയതാരം ഫഹദ് ഫാസിലും പുഷ്പയിലൂടെ പാൻ-ഇന്ത്യ തലത്തിൽ ശ്രദ്ധ നേടിയിരുന്നു. രശ്മിക മന്ദാനയായിരുന്നു നായിക. പുഷ്പ 2 റിലീസ് ചെയ്യുന്നതോടെ അല്ലു അർജുന്റെ പ്രശസ്തി കൂടുതൽ വർധിക്കുമെന്നാണ് സിനിമാ ലോകം വിലയിരുത്തുന്നത്.
