അക്ഷയ് കുമാര്‍, പങ്കജ് തൃപാഠി എന്നിവർ കേന്ദ്ര കഥാപാത്രങ്ങളായെത്തുന്ന കോമഡി ചിത്രം ‘ഓ മൈ ഗോഡ് 2’ വിന്റെ ടീസർ പുറത്ത് വിട്ടു. 2012 ല്‍ പുറത്തിറങ്ങിയ സൂപ്പര്‍ഹിറ്റ് ചിത്രം ‘ഓ മൈ ഗോഡിന്‍റെ’ രണ്ടാം ഭാഗമാണിത്. യാമി ഗൗതം നായികയായി എത്തുന്നു. അമിത് റായിയാണ് ചിത്രത്തിന്റെ തിരക്കഥ എഴുതി സംവിധാനം ചെയ്തിരിക്കുന്നത്. ആദ്യ ഭാഗമൊരുക്കിയത് ഉമേഷ് ശുക്ല ആയിരുന്നു.
അതേസമയം പരേഷ് റാവല്‍ പ്രധാന കഥാപാത്രത്തെ അവതരിപ്പിച്ച ആദ്യ ഭാഗത്തില്‍ ഭഗവാന്‍ കൃഷ്‍ണനെ ആയിരുന്നു അക്ഷയ് കുമാര്‍ അവതരിപ്പിച്ചത്. രണ്ടാം ഭാഗത്തില്‍ ഭഗവാന്‍ ശിവന്റെ രൂപത്തിലാണ് സൂപ്പർതാരം എത്തുന്നത്. അരുൺ ഗോവിൽ, ഗോവിന്ദ് നാംദേവ് എന്നിവരാണ് ചിത്രത്തിലെ മറ്റ് താരങ്ങൾ. ഓഗസ്റ്റ് 11ന് ചിത്രം തിയറ്ററുകളിലെത്തും.
