അഭിനയിച്ച രണ്ട് ചിത്രങ്ങൾ 1000 കോടി ക്ലബ്ബിൽ കയറിയ ഏക നടൻ ആണ് ഷാറുഖ് ഖാൻ. ബോളീവുഡിലെ വിജയ നായകൻ. ഇപ്പോഴിതാ മകൻ ആര്യൻ ഖാൻ സംവിധാനം ചെയ്യുന്ന വെബ്സീരീസിൽ അഭിനയിക്കാൻ ഒരുങ്ങുകയാണ് താരം എന്ന വാർത്തയാണ് ഇപ്പോൾ പുറത്ത് വരുന്നത്. ‘സ്റ്റാർഡം’ എന്നാണ് വെബ്സീരീസിന്റെ പേര്. നടൻ ബോബി ഡിയോളാണ് വെബ്സീരീസിൽ പ്രധാന വേഷത്തിലെത്തുന്നത്. വ്യത്യസ്ത ലുക്കിലായിരിക്കും ബോബി എത്തുന്നത് എന്നാണ് വിവരം. ഇതിനോടകം തന്നെ പല രംഗങ്ങളും ചിത്രീകരിച്ചു കഴിഞ്ഞു.
ആറ് എപ്പിസോഡുകളുള്ള വെബ് സീരീസാണ് സ്റ്റാർഡം. പേര് പോലെതന്നെ സിനിമാ വ്യവസായവുമായി ബന്ധപ്പെട്ട കഥയാണ് വെബ്സീരീസ് പറയുന്നത്. ബോബി ഡിയോളിനെ കൂടാതെ കരൺ ജോഹർ, രൺവീർ സിങ്, രൺബീർ കപൂർ എന്നിവരും പരമ്പരയിൽ അഭിനയിക്കുന്നുണ്ട്. അതേസമയം വെബ്സീരീസിൽ ഒരു നിർണായക രംഗത്തിലായിരിക്കും ഷാറൂഖ് ഖാൻ പ്രത്യക്ഷപ്പെടുകയെന്നും അടുത്ത മൂന്ന് ദിവസത്തിനുള്ളിൽ രംഗങ്ങൾ ചിത്രീകരിക്കുമെന്നും പ്രചരിക്കുന്നുണ്ട്.
നിലവിൽ അന്ധേരിയിലാണ് ചിത്രീകരണം നടക്കുന്നത്. ഈ വർഷം പുറത്തിറങ്ങിയ നടന്റെ ചിത്രങ്ങളായ പത്താനും ജവാനുമാണ് 1000 കോടി ക്ലബ്ബിൽ ഇടംപിടിച്ചത്. അറ്റ്ലി സംവിധാനം ചെയ്ത ജവാൻ ഇപ്പോഴും തിയറ്ററുകളിൽ പ്രദർശനം തുടരുകയാണ്.
