ടൂറിസം വകുപ്പ് മന്ത്രി മുഹമ്മദ് റിയാസിനെ പ്രശംസിച്ച് നടൻ ജയറാം. വിനോദ സഞ്ചാര മേഖലയിലെ ശ്രദ്ധേയമായ പ്രവർത്തനങ്ങൾക്ക് നേതൃത്വം നൽകുന്ന മന്ത്രിയുടെ ഇടപെടലുകൾ പ്രശംസനീയമാണെന്നും ജയറാം കൂട്ടിച്ചേർത്തു. കോഴിക്കോട് ഓണാഘോഷ പരിപാടിയിൽ മുഖ്യാതിഥിയായി എത്തിയപ്പോഴാണ് ജയറാം വിനോദ സഞ്ചാര വകുപ്പിൻ്റെ പ്രവർത്തനങ്ങൾ ശ്രദ്ധേയമാണ് എന്ന് അഭിപ്രായം പങ്കുവച്ചത്.
ഒരു ലക്ഷ്യത്തോട് കൂടിയാണ് മന്ത്രി മുഹമ്മദ് റിയാസ് പ്രവർത്തിക്കുന്നത്. അദ്ദേഹം ഒറ്റയ്ക്കല്ല ഒരു ടീം തന്നെ അദ്ദേഹത്തിന് പിന്നിലുണ്ട്. മാത്രമല്ല ഓരോ കാര്യങ്ങളും ഒരുപാട് പേരോട് ചോദിച്ച് മനസ്സിലാക്കിയാണ് അദ്ദേഹം നടപ്പിലാക്കുന്നതും. കൂടാതെ ലോകത്തിലെ തന്നെ നിർബന്ധമായും കണ്ടിരിക്കേണ്ട 51 സ്ഥലങ്ങൾ ടൈംസ് മാഗസിൻ തിരഞ്ഞെടുത്തപ്പോൾ അതിൽ ഒന്നായി കേരളവും ഉൾപ്പെട്ടത് ഇത്തരം പ്രവർത്തനങ്ങളുടെ ഫലമാണെന്നും ജയറാം കൂട്ടിച്ചേർത്തു.
സിനിമാ ടൂറിസം സംബന്ധിച്ച് എത്രയോ തവണ സംസാരിച്ചിട്ടുണ്ട്. കാരവാൻ ടൂറിസം, വാട്ടർ ടൂറിസം, ഹെലി ടൂറിസം എന്നിങ്ങനെ ഒരുപാട് കാര്യങ്ങളുമായാണ് അദ്ദേഹം മുൻപോട്ട് പോകുന്നത്. വിനോദ സഞ്ചാര മേഖലയിലെ ശ്രദ്ധേയ പ്രവർത്തനങ്ങൾക്ക് നേതൃത്വം നൽകുന്ന എന്റെ പഴയ കാല സുഹൃത്ത് മുഹമ്മദിന് ബിഗ് സല്യൂട്ട് എന്ന് ജയറാം പറഞ്ഞു.
