നടൻ ഹക്കിം ഷാജഹാനും നടി സന അൽത്താഫും വിവാഹിതരായി. തങ്ങളുടെ സോഷ്യൽ മീഡിയ അക്കൗണ്ടിലൂടെയാണ് ഇരുവരും ജീവിതത്തിലെ ഏറ്റവും വലിയ സന്തോഷത്തെക്കുറിച്ച് അറിയിച്ചത്. ഈ വാർത്ത വ്യാജമാണെന്നും ഏതോ സിനിമയുടെ ഭാഗമായാണെന്നുമെല്ലാമാണ് ആരാധകർ ആദ്യം കരുതിയത്. എന്നാൽ സത്യമാണെന്ന് അറിഞ്ഞതോടെ ഞെട്ടലിലാണ് ആരാധകരിപ്പോൾ. താരങ്ങളുടേത് രജിസ്റ്റർ വിവാഹം ആയിരുന്നു. അടുത്ത ബന്ധുക്കളും സുഹൃത്തുക്കളും പങ്കെടുത്ത ചടങ്ങിന്റെ ഫോട്ടോകളാണ് ഇരുവരും സോഷ്യൽ മീഡിയയിൽ പങ്കുവച്ചത്.
ദുൽഖർ നായകനായി എത്തി മാർട്ടിൻ പ്രക്കാട്ട് സംവിധാനം ചെയ്ത എബിസിഡി എന്ന ചിത്രത്തിലൂടെയായിരുന്നു ഹക്കിം ബിഗ് സ്ക്രീനിൽ എത്തിയത്. ഇതിന് ശേഷം അദ്ദേഹത്തിന്റെ തന്നെ ചാർളി എന്നാ ചിത്രത്തിൽ സഹ സംവിധായകനായും ഹക്കിം പ്രവർത്തിച്ചു. ഇതിന് പിന്നാലെ രക്ഷാധികാരി ബൈജു, കൊത്ത്, വിശുദ്ധ മെജോ, അർച്ചന 31, പ്രിയൻ ഓട്ടത്തിലാണ്, പ്രണയ വിലാസം, കടകൻ തുടങ്ങിയ സിനിമകളിലും ഹക്കിം അഭിനയിച്ചു. ഫ്രീഡം അറ്റ് മിഡ്‌നൈറ്റ് എന്ന ഷോർട് ഫിലിമിലും താരം അഭിനയിച്ചിട്ടുണ്ട്. അനുപമ പരമേശ്വരനായിരുന്നു ഇതിലെ നായിക. ഹ്രസ്വചിത്രം ഏറെ ശ്രദ്ധനേടുകയും ചെയ്തിരുന്നു. ‘കടസീല ബിരിയാണി’ എന്നെ തമിഴ് സിനിമയിൽ വില്ലനായും ഹക്കിം മികച്ച പ്രകടനം കാഴ്ച്ചവച്ചിട്ടുണ്ട്. ഒരു കട്ടിൽ ഒരു മുറി, പൊറാട്ട് നാടകം തുടങ്ങിയ സിനിമകളാണ് ഹക്കിമിന്റേതായി ഇനി റിലീസിന് ഒരുങ്ങുന്നത്.
ദുൽഖർ നായികനായി എത്തിയ വിക്രമാദിത്യൻ എന്ന ചിത്രത്തിലൂടെ ആണ് സന അൽത്താഫ് സിനിമയിലെത്തിയത് . ദുൽഖറിന്റെ രണ്ട് സഹോദരിമാരിൽ ഒരാളായിട്ടായിരുന്നു സനയുടെ വെള്ളിത്തിരയിലേക്കുള്ള അരങ്ങേറ്റം. ശേഷം മറിയം മുക്ക് എന്ന ചിത്രത്തിലൂടെ നായികയായി. ഫഹദ് ഫാസിൽ ആയിരന്നു ചിത്രത്തിലെ നായകൻ. സലോമി എന്നായിരുന്നു സനയുടെ കഥാപാത്രത്തിന്റെ പേര്. ഇതിന് ശേഷം റാണി പത്‌മിനി, ബഷീറിന്റെ പ്രേമലേഖനം, ഒടിയൻ തുടങ്ങിയ സിനിമകളിലും ശ്രദ്ധേയമായ വേഷത്തിൽ സന എത്തി.
തമിഴിലും സന അൽത്താഫ് തന്റെ സാന്നിധ്യം അറിയിച്ചിരുന്നു. ചെന്നൈ 28ന്റെ രണ്ടാം ഭാഗം, ആർകെ നഗർ തുടങ്ങിയ തമിഴ് സിനിമകളിലാണ് സന അഭിനയിച്ചത്. ഈ വേഷങ്ങളും ഏറെ ശ്രദ്ധിക്കപ്പെട്ടിരുന്നു. ഇരുവരും പ്രണയത്തിലായിരുന്നു എന്നാണ് സൂചനകൾ. എന്തായാലും ഒട്ടും പ്രതീക്ഷിക്കാതെ വന്ന ഇരുവരുടെയും വിവാഹ ചിത്രത്തിന് താഴെ വിവാഹ ആശംസകൾ നേരുകയാണ് ആരാധകർ.
