ആശുപത്രിയിലാണെന്ന വ്യാജ വാർത്തകൾക്കെതിരെ രസകരമായ പ്രതികരണവുമായി രംഗത്ത് വന്നിരിക്കുകയാണ് നടൻ ബാബുരാജ്. താരത്തെ ഗുരുതരാവസ്ഥയിൽ ആശുപത്രിയിൽ പ്രവേശിപ്പിച്ചുവെന്ന തരത്തിലായിരുന്നു വ്യാജ വാർത്തകൾ ചില യൂട്യൂബ് ചാനലുകളിൽ വന്നത്. ഇതിന് മറുപടിയായി ജിമ്മില്‍ വ്യായാമം ചെയ്യുന്ന വിഡിയോ പങ്കുവച്ചുകൊണ്ടായിരുന്നു ആരോഗ്യത്തെക്കുറിച്ചുള്ള വ്യാജ വാർത്തകൾക്കെതിരെ താരം മറുപടി പറഞ്ഞത്.
ഇപ്പോൾ ‘കാർഡിയോ വർക്ഔട്ട് ‘ചെയ്യുകയാണ്. അല്ലാതെ ആശുപത്രിയിലെ കാർഡിയോ വാർഡിൽ അല്ല ഉള്ളത് എന്ന തലക്കെട്ടോടെയാണ് (ഡൂയിങ് കാർഡിയോ, നോട്ട് ഇൻ കാർഡിയോ വാർഡ്) ജിമ്മിലെ ട്രെഡ് മില്ലിൽ ഓടുന്ന രസകരമായ വിഡിയോ ബാബുരാജ് ഇൻസ്റ്റാഗ്രാമിൽ പങ്കുവച്ചത്. ‘തലക്ക് മീതേ ശൂന്യാകാശം താഴെ മരുഭൂമി എന്ന പാട്ടാണ് വിഡിയോയുടെ ഓഡിയോ ആയി താരം ഉൾപ്പെടുത്തിയിരിക്കുന്നത്.
കഴിഞ്ഞ ദിവസമാണ് ഗുരുതര ആരോഗ്യ പ്രശ്നങ്ങളോടുകൂടി ബാബുരാജിനെ ആശുപത്രിയിൽ പ്രവേശിപ്പിച്ചിരിക്കുകയാണ് എന്ന തരത്തിലുള്ള വാർത്തകൾ വന്നത്. എല്ലാവരും പ്രാർഥനയോടെ കാത്തിരിക്കുകയാണ് എന്ന തലക്കെട്ടോടുകൂടി ഒരു ഓൺലൈൻ മാധ്യമത്തിലൂടെയായിരുന്നു വാർത്ത പ്രചരിച്ചത്. സാന്ദ്ര തോമസ് നിർമ്മിക്കുന്ന ‘നല്ല നിലാവുള്ള രാത്രി’ എന്ന സിനിമയാണ് ബാബുരാജിന്റേതായി പുറത്തിറങ്ങാനിരിക്കുന്ന ഏറ്റവും പുതിയ ചിത്രം. മര്‍ഫി ദേവസി സംവിധാനം ചെയ്ത ചിത്രത്തിൽ ബിനു പപ്പു, ചെമ്പന്‍ വിനോദ്, ഗണപതി, ജിനു ജോസഫ്, റോണി ഡേവിഡ് എന്നിവരും പ്രധാന വേഷങ്ങളിൽ എത്തുന്നുണ്ട്.
