പ്രേക്ഷകർക്കിടയിൽ തരംഗമായി ഫഹദ് ഫാസിലിൻ്റെ ‘ആവേശം’. മികച്ച പ്രതികരണം നേടി തിയേറ്ററിൽ മുന്നേറുന്ന ചിത്രം അഞ്ചാം ദിവസം പിന്നിടുമ്പോൾ 50 കോടി ക്ലബ്ബിലേയ്ക്കാണ് കുതിച്ചുകൊണ്ടിരിക്കുന്നത്. ഇതുവരെ ചിത്രത്തിൻ്റെ ആഗോള കലക്ഷൻ 48 കോടിയാണെന്നാണ് അണിയറ പ്രവർത്തകർ വ്യക്തമാക്കുന്നത്.
തുടർച്ചയായി അഞ്ച് ദിവസവും മൂന്ന് കോടിക്ക് മുകളിലാണ് കേരളത്തിൽ നിന്ന് മാത്രം സിനിമയ്ക്ക് ലഭിച്ചത്. ആദ്യ ദിവസം കേരളത്തിൽ നിന്നും ആവേശം 3.5 കോടി നേടിയപ്പോൾ ആഗോള കലക്ഷനായി ലഭിച്ചത് 10.57 കോടിയായിരുന്നു. പിന്നീട് വന്ന ദിവസങ്ങളിലെല്ലാം ആഗോള കലക്ഷൻ പത്ത് കോടിയാണ്. ഞായറാഴ്ച കേരളത്തിൽ നിന്നും 4 കോടിക്കടുത്ത് കലക്‌ഷനാണ് ലഭിച്ചത്. അന്ന് ആഗോള കലക്ഷൻ 11 കോടിയുമായിരുന്നു.
ഞാൻ പ്രകാശൻ ആണ് ഫഹദ് ഫാസിലിൻ്റെ ആദ്യത്തെ 50 കോടി ചിത്രം. ഇതേ നിലയിൽ തുടർന്നാൽ ഫഹദിന്റെ ആദ്യ 100 കോടി ചിത്രമായി ആവേശം മാറുമെന്നാണ് വിലയിരുത്തൽ. കേരളത്തിന് പുറമെ തമിഴ്നാട്ടിലും ഗംഭീര പ്രതികരണമാണ് സിനിമയ്ക്ക് ലഭിക്കുന്നത്. ഫഹദ് ഫാസിലിന്റെ പുതിയ ലുക്കാണ് ചിത്രത്തിൽ പരീക്ഷിച്ചിരിക്കുന്നത്.
