മലയാള സിനിമാ പ്രേക്ഷകർ ഏറെ പ്രതീക്ഷയോടെ കാത്തിരിക്കുന്ന ചിത്രങ്ങളിലൊന്നാണ് ബ്ലെസി-പൃഥ്വിരാജ് കൂട്ടുകെട്ടിന്റെ ‘ആടുജീവിതം’. എഴുത്തുകാരൻ ബെന്യാമിന്റെ ഇതേ പേരിലുള്ള വിഖ്യാത നോവലിന്റെ ചലച്ചിത്രാവിഷ്കാരമാണ് ചിത്രം. സിനിമയുടെ ചിത്രീകരണം പൂർത്തിയായെങ്കിലും എന്നായിരിക്കും തിയേറ്ററുകളിലെത്തുക എന്നത് വ്യക്തമായിരുന്നില്ല. ഇപ്പോഴിതാ ആടുജീവിതത്തിന്റെ ഔദ്യോഗിക റിലീസ് തീയതി ഈ മാസം മുപ്പതിന് പ്രഖ്യാപിക്കുമെന്ന് അറിയിച്ചിരിക്കുകയാണ് പൃഥ്വിരാജ്.
വ്യാഴാഴ്ച വൈകുന്നേരം നാലുമണിക്കായിരിക്കും പ്രഖ്യാപനം. ഔദ്യോഗിക സോഷ്യൽ മീഡിയ അക്കൗണ്ടുകളിൽ പോസ്റ്റ് ചെയ്ത വീഡിയോയിലൂടെയാണ് പൃഥ്വിരാജ് ഇക്കാര്യം അറിയിച്ചത്. ‘പ്രതീക്ഷയെ പുനർനിർവചിക്കുന്നു’ എന്നാണ് റിലീസ് തീയതി പ്രഖ്യാപനത്തേക്കുറിച്ച് പുറത്ത് വിട്ട വീഡിയോയിൽ വ്യക്തമാക്കിയിരിക്കുന്നത്. സൗദി അറേബ്യയിലെ ഇന്ത്യൻ കുടിയേറ്റ തൊഴിലാളിയായ നജീബ് എന്ന കഥാപാത്രമായാണ് പൃഥ്വി എത്തുക. പൃഥ്വിയുടെ ഞെട്ടിക്കുന്ന രൂപമാറ്റമാണ് സിനിമയുടെ ഏറ്റവും വലിയ പ്രത്യേകത.
മാജിക് ഫ്രെയിംസ് ആണ് സിനിമ വിതരണത്തിനെത്തിക്കുന്നത്. പാൻ ഇന്ത്യൻ ചിത്രമായായിരിക്കും ആടുജീവിതം എത്തുക. പൃഥ്വിരാജിനെ കൂടാതെ അമല പോളും ശോഭ മോഹനുമാണ് മലയാളത്തിൽ നിന്നുള്ള മറ്റ് താരങ്ങൾ. എ.ആർ. റഹ്‌മാനാണ് ചിത്രത്തിന് സംഗീതം നിർവഹിക്കുന്നത് എന്ന പ്രത്യേകതയുമുണ്ട്. കെ.എസ്. സുനിലാണ് ഛായാഗ്രാഹകൻ. പ്രശാന്ത് മാധവ് കലാസംവിധാനവും രഞ്ജിത്ത് അമ്പാടി മേക്കപ്പും നിർവഹിച്ചിരിക്കുന്നു.
2018 മാർച്ചിൽ കേരളത്തിൽ വച്ചായിരുന്നു ആടുജീവിതത്തിന്റെ ചിത്രീകരണം ആരംഭിച്ചത്. തുടർന്ന് ജോർദാൻ, അൾജീരിയ എന്നിവിടങ്ങളിലും ചിത്രീകരണം നടന്നു. ഇതിനിടയിൽ കോവിഡ് കാലത്ത് സംഘം ജോർദാനിൽ കുടുങ്ങിയത് വാർത്തയായിരുന്നു. 2022 ജൂലൈയിലായിരുന്നു ഷൂട്ടിങ് അവസാനിച്ചത്. എന്നാൽ ഈ വർഷം ആദ്യം ചിത്രത്തിന്റെ ദൃശ്യങ്ങൾ ഒരു വെബ്സൈറ്റിലൂടെ ചോർന്നത് അണിയറപ്രവർത്തകരെ ആശങ്കപ്പെടുത്തി. അന്താരാഷ്ട്ര ചലച്ചിത്രമേളകളിൽ പ്രദർശിപ്പിക്കുന്നതിന് മുന്നോടിയായി തയ്യാറാക്കിയ ട്രെയിലറാണ് പുറത്തുവന്നതെന്ന് പിന്നീട് സംവിധായകൻ തന്നെ വിശദീകരിക്കുകയും ചെയ്തു. ശേഷം ട്രെയിലർ എന്ന രീതിയിൽത്തന്നെ ഈ ദൃശ്യങ്ങൾ ഔദ്യോഗികമായി പുറത്തുവിടുകയും ചെയ്തിരുന്നു.
