2022ലെ സംസ്ഥാന ചലച്ചിത്ര അവാർഡുകൾ സാംസ്കാരിക വകുപ്പ് മന്ത്രി സജി ചെറിയാന്‍ പ്രഖ്യാപിച്ചു. മികച്ച നടനുള്ള പുരസ്കാരം മമ്മൂട്ടി സ്വന്തമാക്കി. പുഴു, നന്‍പകല്‍ നേരത്ത് മയക്കം, റോഷാക്ക്, ഭീഷ്മപര്‍വ്വം എന്നീ ചിത്രങ്ങളിലെ അഭിനയത്തിനാണ് താരത്തെ മികച്ച നടനായി തെരഞ്ഞെടുത്തത്. മികച്ച നടിയായി വിൻസി അലോഷ്യസിനെ തെരഞ്ഞെടുത്തു. രേഖ എന്ന ചിത്രത്തിലെ പ്രകടനമാണ് വിന്‍സിയ്ക്ക് മികച്ച നടിയ്ക്കുള്ള പുരസ്കാരം നേടിക്കൊടുത്തത്.
ന്നാ താൻ കേസ് കൊട് ചിത്രത്തിലെ മികച്ച പ്രകടനത്തിന് കുഞ്ചാക്കോ ബോബനും അപ്പൻ എന്ന ചിത്രത്തിലൂടെ അലൻസിയറും പ്രത്യേക ജൂറി പരാമർശം നേടി. നൻപകൽ നേരത്ത് മയക്കം ആണ് മികച്ച ചിത്രമായി തെരഞ്ഞെടുക്കപ്പെട്ടത്. അറിയിപ്പ്മ എന്ന ചിത്രത്തിലൂടെ മഹേഷ് നാരായണന്‍ മികച്ച സംവിധായകനായി.
മികച്ച ജനപ്രിയ ചിത്രമായി ‘ന്നാ താൻ കേസ് കൊട്’ തെരഞ്ഞെടുക്കപ്പെട്ടു. ഇലവീഴാ പൂഞ്ചിറയുടെ സംവിധായകൻ ഷാഹി കബീർ മികച്ച നവാഗത സംവിധായകൻനായി തിരഞ്ഞെടുക്കപ്പെട്ടു. തല്ലുമാലയിലെ ഗാനങ്ങളുടെ നൃത്ത സംയോജനത്തിന് ഷോബി പോൾ രാജ് നൃത്തസംവിധായകനായിതിരഞ്ഞെടുക്കപ്പെട്ടു. മികച്ച പിന്നണി ഗായികയായി മൃദുല വാരിയറും മികച്ച പിന്നണി ഗായകനായി കപിൽ കപിലനുമാണ് പുരസ്കാരം ലഭിച്ചത്. ചിത്രങ്ങളുടെ എണ്ണത്തില്‍ റെക്കോർഡുമായി 154 സിനിമകളാണ് ഇത്തവണ മത്സരരംഗത്തുണ്ടായിരുന്നത്.
