ജയിലുകളിൽ മതസംഘടനകൾക്ക് നടപ്പാക്കിയ വിലക്ക് നീക്കി. ദുഃഖ വെള്ളിയാഴ്ചയും ഈസ്റ്ററും തടവുകാർക്കൊപ്പം പ്രാർത്ഥനയിൽ പങ്കെടുക്കാം. ജയിൽ മേധാവി നടപ്പിലാക്കിയ വിലക്കിനെതിരെ ശക്തമായ എതിർപ്പുയർന്നതോടെയാണ് തുടർന്നാണ് മാറ്റം വരുത്തിയത്. ജയിലുകളിൽ ആധ്യാത്മിക മത പഠന ക്ലാസുകള്‍ക്ക് നിയന്ത്രണം ഏർപ്പെടുത്തിയ ഉത്തരവ് മണിക്കൂറുകൾക്കകം ജയിൽ വകുപ്പ് തിരുത്തി.
കെസിബിസി അധ്യക്ഷൻ മുഖ്യമന്ത്രിയുമായി ചർച്ച നടത്തിയതിന് പിന്നാലെയാണ് മാറ്റം. വിശുദ്ധ വാരത്തിൽ വന്ന നിയന്ത്രണം പിൻവലിക്കണം എന്ന് കർദ്ദിനാൾ ക്ലിമ്മീസ് ആവശ്യപ്പെടുകയായിരുന്നു.
സംസ്ഥാനത്തെ എല്ലാ ജയിലുകളിലും മത സംഘടനകൾക്ക് ജയിലിനുള്ളിൽ പ്രവേശനമുണ്ടായിരുന്നു. ഇവർ തടവുപുള്ളികൾക്ക് ആധ്യാത്മിക ക്ലാസുകളും നൽകിയിരുന്നു. ഇത്തരം സംഘടനകളെ പ്രവേശിപ്പിക്കേണ്ടെന്നായിരുന്നു ജയിൽ മേധാവിയുടെ ഉത്തരവ്. ഇതിന് പിന്നിൽ ചില കാരണങ്ങളുണ്ടെന്ന് പറഞ്ഞ അദ്ദേഹം എന്താണ് കാരണമെന്ന് വ്യക്തമാക്കിയിരുന്നില്ല.
