തൃശൂർ പൂരം കാണികൾക്ക് വലിയ ആവേശം പകരുന്ന ഒന്നാണ്. കുടമാറ്റം ആകട്ടെ ആ സന്തോഷത്തിന്റെ പാരമ്യവും. തൃശൂർ പൂരത്തിന്റെ ആരവമൊഴിഞ്ഞിട്ടും സമൂഹ മാധ്യമങ്ങളിൽ വൈറൽ ആയൊരു വീഡിയോ ഉണ്ട്‌.
കുടമാറ്റം കാണാൻ തിങ്ങികൂടിയ ആസ്വാദകർക്കിടയിൽ യുവതിയെ ചുമലിലേറ്റി പൂരം കാണിക്കുന്ന യുവാവും കൺനിറയെ പൂരം കാണവേ സന്തോഷം കൊണ്ട് കരയുന്ന യുവതിയുടെയും ദൃശ്യങ്ങളാണ് സോഷ്യൽ മീഡിയയിൽ വൈറൽ ആകുന്നത്. ഇവർ ആരാണ് എന്നത് ഇതുവരെ വ്യക്തമായിട്ടില്ല.
മന്ത്രി ഡോ.ആർ ബിന്ദു അടക്കമുള്ളവർ വീഡിയോ ഷെയർ ചെയ്തിട്ടുണ്ട്. സ്ത്രീകൾക്കും പൂരം ആസ്വദിക്കാൻ കഴിയുമെന്നത് മനസ് നിറക്കുന്ന കാഴ്ചയാണെന്നാണ് സോഷ്യൽ മീഡിയ ഒന്നടങ്കം പറയുന്നത്.
കോവിഡ് കാലത്തിന് മുൻപ് നടന്ന പൂരങ്ങളെക്കാൾ ഇരട്ടിയാളുകളാണ് ഇത്തവണ പൂരം കാണാനെത്തിയത്. എല്ലായിടത്തും വലിയ തിക്കും തിരക്കുമായിരുന്നു. മഴ വില്ലൻ ആയതോടെ വെടിക്കെട്ട് രണ്ട് തവണ മാറ്റിവെക്കേണ്ടി വന്നു. ഞായറാഴ്ച്ച വെടിക്കെട്ട് നടത്താനാണ് ഇപ്പോൾ തീരുമാനിച്ചിരിക്കുന്നത്.
