മുന്‍ അമേരിക്കന്‍ പ്രസിഡന്റ് ഡൊണാള്‍ഡ് ട്രംപിന് ട്വിറ്ററിലേക്ക് തിരിച്ചുവരാനുള്ള തടസം നീക്കുമെന്ന് ഇലോണ്‍ മസ്ക്. ട്രംപിനെ ട്വിറ്ററില്‍ നിന്ന് പൂര്‍ണമായി വിലക്കിയ നടപടി പുനപരിശോധിക്കുമെന്ന് ഫിനാന്‍ഷ്യല്‍ ടൈംസിന് അനുവദിച്ച പ്രത്യേക അഭിമുഖത്തിൽ പരാമര്‍ശിച്ചിരിക്കുകയാണ് മസ്ക്.
‘താന്‍ ഇതുവരെയും ട്വിറ്റര്‍ സ്വന്തമാക്കിയിട്ടില്ലാത്തതിനാൽ വിലക്ക് നീക്കാന്‍ ഇപ്പോള്‍ തനിക്ക് കഴിയില്ല’ എന്നാണ് മസ്കിന്റെ വാക്കുകൾ.
തന്റെ അക്കൗണ്ട് പുനസ്ഥാപിച്ചാലും ഇനി ട്വിറ്ററിലേക്കില്ലെന്ന് ട്രംപ് പ്രതികരിച്ചിരുന്നു. ട്രംപിന്റെ ട്വിറ്റര്‍ അക്കൗണ്ടുകള്‍ എന്നന്നേക്കുമായി മരവിപ്പിച്ചതോടെ സ്വന്തം പ്ലാറ്റ്‌ഫോമിലൂടെയാണ് ട്രംപ് ആശയവിനിമയം നടത്തിയിരുന്നത്. ട്രംപിന്റെ ഗൂഢാലോചനയാണ് ക്യാപിറ്റോള്‍ ആക്രമത്തിന് പിന്നിലെന്ന റിപ്പോര്‍ട്ടിന്റെ അടിസ്ഥാനത്തിലായിരുന്നു ട്രംപിനെ ട്വിറ്റര്‍ വിലക്കിയത്.
അഭിപ്രായ സ്വാതന്ത്ര്യത്തെക്കുറിച്ച് വാചാലനാകുന്ന മസ്ക്, ആളുകളെ എന്നേക്കുമായി വിലക്കുന്ന നടപടി പുനപരിശോധിക്കുമെന്നാണ് അറിയിക്കുന്നത്. ട്വീറ്റ്‌ ചെയ്യുന്ന ഉള്ളടക്കങ്ങള്‍ക്ക് നിയന്ത്രണങ്ങള്‍ ഏര്‍പ്പെടുത്തുന്നതിനെതിരെ നിരന്തരം വിമർശനം ഉന്നയിക്കാറുണ്ട് ഇലോൺ മസ്ക്.
