2022 ലോകകപ്പ് നേടിയതിന്‍റെ ആദരസൂചകമായി അർജന്റീന ടീമിന്റെ ക്യാപ്റ്റന്‍ ലയണൽ മെസ്സിയുടേയും ടീമിന്റേയും ചിത്രം ഉൾപ്പെടുത്തി നോട്ട് പുറത്തിറക്കാന്‍ നീക്കം. ചിത്രങ്ങൾ ഉൾക്കൊളളിച്ച് പുതിയ ആയിരത്തിന്‍റ അർജന്റീന പെസോയുടെ ഗ്രാഫിക്കല്‍ പതിപ്പ് അര്‍ജന്‍റീന സെന്‍ട്രല്‍ ബാങ്ക് പുറത്തുവിട്ടു.
ഖത്തറിൽ നടന്ന ലോകകപ്പിൽ അര്‍ജന്‍റീനയുടെ ചരിത്രപരമായ കിരീടധാരണം ആഘോഷിക്കുന്നതിനും താരങ്ങളെ ആദരിക്കുന്നതിനുമുളള മാര്‍ഗങ്ങൾ സെൻട്രൽ ബാങ്ക് ഉദ്യോഗസ്ഥർ പഠിച്ചുവരികയാണെന്നാണ് റിപ്പോര്‍ട്ടുകൾ. നോട്ടിന് പുറമെ സ്മാരക വാണിജ്യ നാണയങ്ങൾ പുറത്തിറക്കാനും പദ്ധതിയുണ്ട്.
ആയിരത്തിന്‍റെ പെസോയില്‍ 1000 എന്ന സംഖ്യയുടെ തുടക്കത്തിലുളള “10” എന്ന അക്കത്തിന് പ്രത്യേക പ്രാധാന്യം നല്‍കി മെസ്സിയുടെ ജ‍ഴ്സി നമ്പറിനെ അടയാ‍ളപ്പെടുത്തും. കോച്ച് ലയണൽ സ്‌കലോനിയുടെ വിജയി ടീമിന്റെ പ്രതീകമായി ലാ സ്‌കലോനെറ്റ” എന്നും ഗ്രാഫിക്കല്‍ നോട്ടില്‍ എഴുതിയിട്ടുണ്ട്. അർജന്റീന കിരീടം ചൂടിയ നിമിഷം മുതല്‍ രാജ്യം വൻ ആഘോഷങ്ങൾക്കാണ് സാക്ഷ്യം വഹിക്കുന്നത്.
