ഇന്ത്യൻ ഹോക്കി ടീം ക്യാപ്റ്റൻ ഹർമൻപ്രീത് സിങ്ങിനും പാര അത്ലീറ്റ് പ്രവീൺ കുമാറിനും മേജർ ധ്യാൻ ചന്ദ് ഖേൽ രത്ന പുരസ്കാരത്തിന് ശുപാർശ. പാരിസ് ഒളിംപിക്സിലെ മെഡൽ നേട്ടമാണ് ഇരുവരെയും പുരസ്കാരത്തിന് ശുപാർശ ചെയ്യുന്നതിലേയ്ക്ക് എത്തിച്ചത്.
ഒളിംപിക്സിൽ വെങ്കല മെഡൽ നേടിയ ഇന്ത്യൻ ഹോക്കി ടീമിനെ നയിച്ചത് ഹർമൻപ്രീത് സിങ്ങായിരുന്നു. പാരിസ് പാരാലിംപിക്സിൽ ടി64 പുരുഷ ഹൈജംപിൽ സ്വർണം നേടിയ താരമാണ് പ്രവീൺ കുമാർ. അതേസമയം, പാരിസിൽ ഇരട്ട മെഡലുകൾ നേടിയ ഷൂട്ടിങ് താരം മനു ഭാകറിന്റെ പേര് പട്ടികയിൽ ഇല്ല. മനു പുരസ്‌കാരത്തിനായി അപേക്ഷിച്ചിട്ടില്ലെന്നാണ് കായിക മന്ത്രാലയത്തിലെ ഉദ്യോഗസ്ഥർ പറയുന്നത്.
സുപ്രീം കോടതി ജഡ്‌ജിയായിരുന്ന ജസ്റ്റിസ് വി. രാമസുബ്രഹ്‌മണ്യൻ നേതൃത്വം നൽകുന്ന 12 അംഗ സിലക്ഷൻ കമ്മിറ്റിയാണ് പുരസ്‌കാരത്തിനായി താരങ്ങളെ ശുപാർശ ചെയ്ത‌ത്.
