യുഎഇയിലേക്കുള്ള ഇന്ത്യക്കാരുടെ കുടിയേറ്റം ദിനംപ്രതി വർധിക്കുകയാണ്. നിലവിൽ സർവകാല റെക്കോർഡിലെത്തി നിൽക്കുകയാണ് ഇന്ത്യൻ പ്രവാസികളുടെ എണ്ണം. ദുബായ് കോൺസുലേറ്റിൻ്റെ ഏറ്റവും പുതിയ കണക്ക് പ്രകാരം യുഎഇയിൽ 39 ലക്ഷം ഇന്ത്യക്കാരുണ്ടെന്നാണ് റിപ്പോർട്ട്.
2012-ൽ 22 ലക്ഷമായിരുന്നതാണ് ഇപ്പോൾ 40 ലക്ഷത്തിനടുത്തെത്തിയിരിക്കുന്നത്. 12 വർഷത്തിനിടെ 17 ലക്ഷം പേരാണ് ഇന്ത്യയിൽ നിന്ന് അധികമായി യുഎഇയിലേയ്ക്ക് എത്തിയത്. കഴിഞ്ഞ ഒരു വർഷം മാത്രം 1,30,000 ഇന്ത്യക്കാർ യുഎഇയിലെത്തിയതായി ദുബായിലെ ഇന്ത്യൻ കോൺസുൽ ജനറൽ സതീഷ് കുമാർ ശിവൻ പറഞ്ഞു.
ജനസംഖ്യ വർധിച്ചതിനൊപ്പം ഇന്ത്യയും യുഎഇയും തമ്മിലുള്ള ഉഭയകക്ഷി ബന്ധം ശക്തിപ്പെട്ടതായും യുപിഐ അടക്കമുള്ള പേയ്മെൻ്റ് പ്ലാറ്റ്ഫോമുകൾ വന്നത് സാമ്പത്തിക ഇടപാടുകൾ ലളിതമാക്കിയിട്ടുണ്ടെന്നും സതീഷ് കുമാർ ശിവൻ വ്യക്തമാക്കി. ഇൻസ്റ്റിറ്റ്യൂട്ട് ഓഫ് ചാർട്ടേഡ് അക്കൗണ്ടന്റ്സ് ഓഫ് ഇന്ത്യയുടെ ദുബായ് ചാപ്റ്റർ സംഘടിപ്പിച്ച കോൺഫറൻസിൽ സംസാരിക്കുകയായിരുന്നു അദ്ദേഹം.
