മലയാളത്തിന്റെ സ്വന്തം താരരാജാക്കന്മാരായ മമ്മൂട്ടിയും മോഹൻലാലും വർഷങ്ങൾക്ക് ശേഷം ഒരുമിച്ച് സ്ക്രീനിലെത്തുകയാണ്. മഹേഷ് നാരായണൻ സംവിധാനം ചെയ്യുന്ന ചിത്രത്തിലാണ് ഇരുവരും ഒരുമിച്ച് അഭിനയിക്കുന്നത്. ചിത്രത്തിന്റെ സെറ്റിൽ നിന്നുള്ള ഒരു ചിത്രമാണ് ഇപ്പോൾ സാമൂഹ്യമാധ്യമങ്ങളിൽ തരംഗമാകുന്നത്. മമ്മൂട്ടിക്കും മോഹൻലാലിനുമൊപ്പം കുഞ്ചാക്കോ ബോബൻ എടുത്ത സെൽഫിയാണ് വൈറലായിരിക്കുന്നത്.
സിനിമയുടെ ചിത്രീകരണവുമായി ബന്ധപ്പെട്ട് മമ്മൂട്ടിയും മോഹൻലാലും കൊളംബോയിലെ സെറ്റിലെത്തിയപ്പോൾ കുഞ്ചാക്കോ ബോബൻ പകർത്തിയ ചിത്രമാണത്. മോഹൻലാലിനെ തോളോട് ചേർത്ത് പിടിച്ചാണ് ചിത്രത്തിൽ മമ്മൂട്ടി നിൽക്കുന്നത്. മലയാളത്തിന്റെ ‘ബിഗ് എം’സിനൊപ്പം എന്ന തലക്കെട്ടിലാണ് ചാക്കോച്ചൻ ചിത്രങ്ങൾ പോസ്റ്റ് ചെയ്തിരിക്കുന്നത്.
സെൽഫിക്ക് പുറമെ താരരാജാക്കന്മാർക്കൊപ്പം സമയം ചിലവിടുന്ന കുഞ്ചാക്കോ ബോബന്റെ മറ്റ് രണ്ട് ചിത്രങ്ങളും താരം പങ്കുവെച്ചിട്ടുണ്ട്. മാലിക് എന്ന ചിത്രത്തിനുശേഷം മഹേഷ് നാരായണൻ സംവിധാനം ചെയ്യുന്ന ചിത്രത്തിൽ കുഞ്ചാക്കോ ബോബനും ഒരു പ്രധാന വേഷത്തിലെത്തുന്നുണ്ട്. മുൻപ് ഹരികൃഷ്‌ണൻസ് എന്ന ചിത്രത്തിൽ മമ്മൂട്ടിക്കും മോഹൻലാലിനുമൊപ്പം കുഞ്ചാക്കോ ബോബനും വേഷമിട്ടിരുന്നു.
