സഞ്ജു സാംസൻ്റെ ജന്മദിനം ആഘോഷമാക്കി ഇന്ത്യൻ ക്രിക്കറ്റ് ടീം. ദക്ഷിണാഫ്രിക്കയിൽ ടി20 പരമ്പരയിലെ രണ്ടാം ടി20ക്ക് വേദിയായ സെൻ്റ് ജോർജ്‌സ് പാർക്കിൽ നിന്ന് സെഞ്ചൂറിയനിലേക്ക് മൂന്നാം മത്സരത്തിനായുള്ള യാത്രയ്ക്കിടെയാണ് ടീം അംഗങ്ങൾ സഞ്ജുവിൻ്റെ 30-ാം പിറന്നാൾ ആഘോഷിച്ചത്.
ബസ് യാത്രയ്ക്കിടെ കോച്ച് വി.വി.എസ്. ലക്ഷമണും ടീം അംഗങ്ങളും സ്റ്റാഫുമെല്ലാം ചേർന്നാണ് സഞ്ജുവിന് പിറന്നാൾ ആശംസ അറിയിച്ചത്. പിന്നീട് ഹോട്ടലിലെത്തിയ ശേഷം പിറന്നാൾ കേക്കും മുറിച്ചു. ഇതിന്റെ വീഡിയോ ബി.സി.സി.ഐ സോഷ്യൽ മീഡിയയിൽ പങ്കുവെക്കുകയും ചെയ്തു.
ടീം അംഗങ്ങൾക്ക് പുറമെ നിരവധി ആരാധകരും സഞ്ജുവിന് ആശംസ അറിയിച്ചിരുന്നു. സെഞ്ചുറികൾ വാരിക്കൂട്ടുന്ന സഞ്ജുവിന് ഇനി മുന്നോട്ട് നല്ല കാലമാണെന്നാണ് ആരാധകരുടെ കമന്റ്.
