ബോളിലുഡിലെ എക്കാലത്തെയും മികച്ച പ്രണയ ചിത്രമായ ‘കല്‍ ഹോ നാ ഹോ’ വീണ്ടുമെത്തുന്നു. 21 വര്‍ഷങ്ങള്‍ക്കുശേഷം റീ-റിലീസിനൊരുങ്ങിയിരിക്കുകയാണ് ചിത്രം. നവംബർ 15-ന് ചിത്രം റീ-റിലീസ് ചെയ്യുമെന്നാണ് നിർമ്മാതാക്കളായ ധർമ പ്രൊഡക്ഷൻസ് അറിയിച്ചത്.
‘എ സ്റ്റോറി ഓഫ് എ ലൈഫ് ടൈം.. ഇൻ എ ഹാർട്ട് ബീറ്റ്’ എന്ന ടാഗ് ലൈനോടെ ജനങ്ങൾക്കിടയിലേയ്ക്ക് എത്തിയ ചിത്രത്തിൽ ഷാരൂഖ് ഖാനും പ്രീതി സിൻ്റയും സെയ്‌ഫ് അലി ഖാനും മികച്ച പ്രകടനം കാഴ്ചവെച്ച് വിജയം കൊയ്യുകയായിരുന്നു. പ്രണയത്തിന്റെ ത്യാഗത്തെക്കുറിച്ച് ഇതിലും മനോഹരമായി പറഞ്ഞിട്ടുള്ള മറ്റൊരു ചിത്രമുണ്ടാവില്ലെന്ന് തന്നെ പറയാം.
ബോളിവുഡിന്റെ എക്കാലത്തെയും പ്രിയപ്പെട്ട ചിത്രങ്ങളിൽ ഒന്നായി കൽ ഹോ നാ ഹോ മാറുകയായിരുന്നു. കരൺ ജോഹർ കഥയും തിരക്കഥയും ഒരുക്കിയ ചിത്രത്തിൽ ജയ ബച്ചൻ, സുഷമ സേത്ത്, റീമ ലഗൂ, ലില്ലെറ്റെ ഡൂബെ, ഡെൽനാസ് പോൾ തുടങ്ങി മികച്ച താരനിര തന്നെയാണ് അണിനിരന്നത്.
