ട്രാഫിക് പിഴകളിൽ 50 ശതമാനം ഇളവ് പ്രഖ്യാപിച്ച് അജ്മാൻ. നവംബർ 4 മുതൽ ഡിസംബർ 15 വരെയുള്ള ട്രാഫിക് പിഴകളിലാണ് അജ്മാൻ പൊലീസ് 50 ശതമാനം കിഴിവ് പ്രഖ്യാപിച്ചിരിക്കുന്നത്.
എക്സ് പ്ലാറ്റ്‌ഫോമിലൂടെയായിരുന്നു അധികൃതർ ഇക്കാര്യം അറിയിച്ചത്. ഇതുവഴി നിയമലംഘനം രജിസ്റ്റർ ചെയ്ത വാഹനങ്ങളും ട്രാഫിക് പോയിൻ്റുകളും പിടിച്ചെടുക്കുന്നത് റദ്ദാക്കുകയും ചെയ്യും. എന്നാൽ ഗുരുതരമായ ലംഘനങ്ങൾക്ക് ഇത് ബാധകമാകില്ലെന്ന് അധികൃതർ വ്യക്തമാക്കി.
ലൈറ്റ് അല്ലെങ്കിൽ ഹെവി വാഹനങ്ങൾ അശ്രദ്ധമായി ഓടിക്കുക, ഓവർടേക്ക് ചെയ്യുന്നത് നിരോധിച്ചിരിക്കുന്ന സ്ഥലത്ത് ട്രക്ക് ഡ്രൈവർമാർ ഓവർടേക്ക് ചെയ്യുക, പരമാവധി വേഗപരിധി 80 കിലോമീറ്ററിൽ കൂടുതൽ, മുൻകൂർ അനുമതിയില്ലാതെ വാഹനത്തിൽ മാറ്റം വരുത്തുക എന്നിവയാണ് തീരുമാനത്തിൽ ഉൾപ്പെടുത്തിയിട്ടില്ലാത്ത ഗുരുതരമായ ലംഘനങ്ങൾ.
