യുഎഇയിലെ പൊതുമാപ്പ് കാലാവധി ഇന്ന് അവസാനിക്കും. ഈ സാഹചര്യത്തിൽ നിയമലംഘകരെ കണ്ടെത്താൻ നാളെ മുതൽ ശക്തമായ പരിശോധനകൾ നടത്താനൊരുങ്ങുകയാണ് അധികൃതർ. നവംബർ ഒന്ന് മുതൽ അനധികൃത താമസക്കാരെ ജോലിക്ക് നിയമിച്ചാൽ തൊഴിലുടമകൾക്ക് 10 ലക്ഷം ദിർഹം വരെ പിഴ ചുമത്തും.
ഫെഡറൽ അതോറിറ്റി ഫോർ ഐഡന്റിറ്റി, സിറ്റിസൺഷിപ്പ്, കസ്റ്റംസ്, പോർട്ട് സെക്യൂരിറ്റി (ഐസിപി), ദുബായിലെ ജനറൽ ഡയറക്ടറേറ്റ് ഓഫ് റെസിഡൻസി ആന്റ് ഫോറിനേഴ്‌സ് അഫയേഴ്മായി (ജിഡിആർഎഫ്എ) ഏകോപിപ്പിച്ച് പൊതുമാപ്പ് അവസാനിച്ചതിന് ശേഷം ഓവർസ്റ്റേയേഴ്സിനെ നിയമിക്കരുതെന്ന് മുന്നറിയിപ്പ് നൽകിയിട്ടുണ്ട്.
സെപ്റ്റംബർ ഒന്നിനായിരുന്നു രണ്ട് മാസത്തെ കാലാവധിയോടെ രാജ്യത്ത് പൊതുമാപ്പിന് തുടക്കമായത്. ഇതിനോടകം മലയാളികൾ ഉൾപ്പെടെ നിരവധി പേരാണ് ആനുകൂല്യം പ്രയോജനപ്പെടുത്തി നാട്ടിലേയ്ക്ക് മടങ്ങുകയും താമസം നിയമവിധേയമാക്കുകയും ചെയ്തത്.
