തിയേറ്ററുകളിൽ ചിരിയുടെ പൂരം തീർക്കാൻ ‘കുണ്ടന്നൂരിലെ കുത്സിതലഹള’ എത്തുന്നു. ഒക്ടോബർ 24-ന് ജിസിസി രാജ്യങ്ങളിൽ ഉൾപ്പടെയാണ് ചിത്രം റിലീസ് ചെയ്യുക. ന്യൂജെൻ താരങ്ങൾക്ക് ഏറെ പ്രധാന്യമുള്ള ചിത്രത്തിന്‍റെ ഫസ്റ്റ് ലുക്ക് പോസ്റ്ററും ട്രെയിലറും വൻ ഹിറ്റായി മാറിയിരുന്നു. സ്ത്രീ കഥാപാത്രകൾക്ക് മുൻതൂക്കം നൽകുന്ന ചിത്രം ഒരു ഗ്രാമത്തിൽ നടക്കുന്ന സംഭവങ്ങളെ കോർത്തിണക്കി ഒരുക്കിയിരിക്കുന്നതാണ്.
കുണ്ടന്നൂർ എന്ന ഗ്രാമത്തിലെ സ്ത്രീകളുടെയും യുവാക്കളുടെയും തൊഴിലെടുക്കാൻ മടിയുള്ള ഒരു കൂട്ടം ഭർത്താന്മാരുടെയും ജീവിതത്തിൽ സംഭവിക്കുന്ന അസാധാരണ സംഭവങ്ങളാണ് ചിത്രത്തിന്‍റെ ഉള്ളടക്കം. ട്രെയിലറിലെ തൊഴിലുറപ്പ് സ്ത്രീകൾ തമ്മിലുള്ള ആക്ഷൻ രംഗങ്ങൾ സമൂഹമാധ്യമങ്ങളിൽ വൻ തരംഗം സൃഷ്ടിച്ചിരിക്കുകയാണ്. പുതുമുഖ സംവിധായകനായ അക്ഷയ് അശോകാണ് ചിത്രം അണിയിച്ചൊരുക്കുന്നത്. അക്ഷയ് തന്നെയാണ് തിരക്കഥയും രചിച്ചിരിക്കുന്നത്.
കേഡർ സിനി ക്രിയേഷൻസിന്‍റെ ബാനറിൽ ഒരുക്കുന്ന ചിത്രത്തിൽ ലുക്മാൻ അവറാൻ, വീണാ നായർ, ആശാ മഠത്തിൽ, ജെയിൻ ജോർജ്, സുനീഷ് സാമി, പ്രദീപ് ബാലൻ, ദാസേട്ടൻ കോഴിക്കോട്, സെൽവരാജ്, ബേബി, മേരി, അനുരദ് പവിത്രൻ, അധിൻ ഉള്ളൂർ, സുമിത്ര, ആദിത്യൻ എന്നിവർക്കൊപ്പം നിരവധി പുതുമുഖ താരങ്ങളും അഭിനയിക്കുന്നുണ്ട്.
