തൻ്റെ പേരും ചിത്രവും ഉൾപ്പെടുത്തി നിക്ഷേപ തട്ടിപ്പ് നടത്തിയെന്ന പരാതിയുമായി ഗായിക കെ.എസ് ചിത്ര. പേരും ചിത്രവും വെച്ച് വ്യാജ സോഷ്യൽ മീഡിയാ അക്കൗണ്ടുകൾ ഉണ്ടാക്കി പണം ആവശ്യപ്പെട്ട് സന്ദേശങ്ങൾ പ്രചരിപ്പിക്കുന്നതിനെതിരെ ചിത്ര പൊലീസിൽ പരാതി നൽകി.
10,000 രൂപ നിക്ഷേപിച്ചാൽ ഒരാഴ്‌ചയ്ക്കകം 50,000 രൂപ ലഭിക്കുന്ന പദ്ധതിയുടെ അംബാസഡറാണ് ചിത്രയെന്ന വിധത്തിലാണ് സന്ദേശങ്ങൾ അയക്കുന്നത്. ഐ ഫോൺ ഉൾപ്പെടെ സമ്മാനങ്ങൾ കാത്തിരിക്കുന്നതായും സന്ദേശത്തിൽ ഉൾപ്പെടുത്തിയിട്ടുണ്ട്. തന്റെ പേരിൽ തട്ടിപ്പ് നടക്കുന്നുണ്ടെന്ന് ശ്രദ്ധയിൽപ്പെട്ടതോടെയാണ് ചിത്ര പൊലീസിനെ സമീപിച്ചത്. ഇതേത്തുടർന്ന് സൈബർ ക്രൈം വിഭാഗം അഞ്ച് അക്കൗണ്ടുകൾ പൂട്ടിച്ചു. ഇത്തരം സന്ദേശങ്ങൾ വിശ്വസിക്കരുതെന്ന് ചിത്ര ആവശ്യപ്പെട്ടു.
തട്ടിപ്പുമായി ബന്ധപ്പെട്ട് കഴിഞ്ഞ ദിവസം ചിത്ര ഒരു സ്ക്രീൻഷോട്ട് പുറത്തുവിട്ടിരുന്നു. ഇത് ശരിക്കും ചിത്ര ചേച്ചിയാണോ എന്ന് ഒരാൾ ചോദിക്കുമ്പോൾ അതെയെന്നും താൻ ഈ കമ്പനിയുടെ ബ്രാൻഡ് അംബാസിഡറാണെന്നും വ്യാജൻ മറുപടി കൊടുത്തതാണ് സ്ക്രീൻഷോട്ടിലുണ്ടായിരുന്നത്.
