അന്തരിച്ച നടൻ ടി.പി മാധവനെ അവസാനമായി കാണാനെത്തി മക്കൾ. മകൻ രാജകൃഷ്ണ മേനോനും മകൾ ദേവികയുമാണ് അവസാനമായി അച്ഛന് അന്ത്യാഞ്ജലി അർപ്പിക്കാനെത്തിയത്. ടി.പി മാധവന്റെ മൃതദേഹം തിരുവനന്തപുരത്ത് പൊതുദർശനത്തിന് വെച്ചപ്പോഴാണ് മക്കൾ കാണാനെത്തിയത്. നീണ്ട വർഷങ്ങൾക്ക് ശേഷമാണ് മക്കൾ അച്ഛനെ കാണുന്നത്.
ഏകദേശം 30 വർഷത്തോളമായി ഭാര്യയും മക്കളുമായി അകന്ന് കഴിയുകയായിരുന്നു ടി.പി മാധവൻ. മൂത്ത മകന് രണ്ടര വയസുള്ളപ്പോഴാണ് അദ്ദേഹം കുടംബത്തെ ഉപേക്ഷിച്ച് അഭിനയത്തിലേയ്ക്ക് തിരിയുന്നതും കുടുംബവുമായി അകലുന്നതും. പിന്നീട് അദ്ദേഹത്തിന് എല്ലാം സിനിമയായിരുന്നു. മലയാള സിനിമയിൽ നാല് പതിറ്റാണ്ട് കാലം നിറസാന്നിധ്യമായിരുന്നു ടി.പി മാധവൻ. അവസാന കാലത്ത് ആരോരുമില്ലാതായതോടെ അദ്ദേഹം പത്തനാപുരം ഗാന്ധിഭവനിലായിരുന്നു താമസിച്ചിരുന്നത്.
ടി.പി.മാധവന്റെ മകൻ രാജകൃഷ്ണ മേനോൻ ബോളിവുഡിലെ ഹിറ്റ് സംവിധായകനാണ്. അക്ഷയ് കുമാർ നായകനായി എത്തിയ എയർ ലിഫ്റ്റ്, സെയ്‌ഫ് അലിഖാൻ്റെ ഷെഫ് എന്നീ ചിത്രങ്ങൾ സംവിധാനം ചെയ്തിട്ടുണ്ട്. ടി.പി മാധവന് അന്ത്യാഞ്ജലി അർപ്പിക്കാൻ സഹോദരങ്ങളും എത്തിയിരുന്നു.
