മലയാളി സിനിമാ പ്രേമികളുടെ എക്കാലത്തെയും ഇഷ്ട മമ്മൂട്ടി ചിത്രമായ ‘ഒരു വടക്കൻ വീരഗാഥ’ വീണ്ടും തിയേറ്ററിലേയ്ക്ക് എത്തുന്നു. 4 കെ ദൃശ്യമികവിലാണ് ചിത്രം വീണ്ടും പ്രദർശനത്തിന് എത്തുന്നത്. ഹരിഹരൻ-എംടി വാസുദേവൻ നായർ-മമ്മൂട്ടി കൂട്ടുകെട്ടിൽ 1989-ൽ പുറത്തിറങ്ങിയ ക്ലാസിക് ചിത്രം 35 വർഷങ്ങൾക്ക് ശേഷമാണ് വീണ്ടും ബിഗ് സ്ക്രീനിലേയ്ക്ക് എത്തുന്നത്.
ചിത്രത്തിൻ്റെ 4കെ റീമാസ്‌റ്റർ പതിപ്പിന്റെ ടീസർ പുറത്തിറക്കിയിട്ടുണ്ട്. മാറ്റിനി നൗ ആണ് ചിത്രം 4 കെ അറ്റ്മോസിൽ ചിത്രം റീ റിലീസിനെത്തിക്കുന്നത്. വടക്കൻ പാട്ടുകളെ ആസ്‌പദമാക്കി നിർമ്മിച്ച ചിത്രത്തിൽ ചന്തു ചേകവരെന്ന ഐതിഹാസിക കഥാപാത്രത്തെയാണ് മമ്മൂട്ടി അവതരിപ്പിച്ചത്. സുരേഷ് ഗോപി, ബാലൻ കെ. നായർ, ക്യാപ്റ്റൻ രാജു, മാധവി തുടങ്ങിയ താരങ്ങളും ചിത്രത്തിൽ സുപ്രധാന കഥാപാത്രങ്ങളെ അവതരിപ്പിച്ചു.
ഏഴ് സംസ്ഥാന പുരസ്‌കാരങ്ങളാണ് ചിത്രം നേടിയിരുന്നത്. മമ്മൂട്ടിക്ക് ആ വർഷത്തെ ദേശീയ പുരസ്‌കാരം നേടിക്കൊടുത്ത ചിത്രം, മികച്ച തിരക്കഥയ്ക്കുള്ള ദേശീയ പുരസ്കാരവും മികച്ച പ്രൊഡക്ഷൻ, കോസ്‌റ്റ്യൂം ഡിസൈനുള്ള ദേശീയ പുരസ്കാരവും നേടി.
