നടി സ്വാസികയുടെയും സീരിയൽ താരം പ്രേം ജേക്കബിന്റെയും വിവാഹം വളരെ ആഘോഷപൂർവ്വമായിരുന്നു നടത്തിയത്. ഇപ്പോൾ വിവാഹശേഷമുള്ള സ്വാസികയേക്കുറിച്ച് ചില തുറന്നുപറച്ചിലുകൾ നടത്തുകയാണ് പ്രേം. സ്വാസിക എന്നും രാവിലെ എഴുന്നേല്‍ക്കുമ്പോള്‍ തന്റെ കാൽ തൊട്ടുതൊഴുമെന്നും താനും അങ്ങനെ തിരിച്ച് ചെയ്യുമെന്നും താൻ കഴിച്ച പ്ലേറ്റിൽ സ്വാസിക ഭക്ഷണം കഴിക്കുമെന്നുമാണ് പ്രേം പറഞ്ഞത്.
“സ്വാസിക രാവിലെ എഴുന്നേറ്റ് എൻ്റെ കാൽ തൊട്ടുതൊഴാറുണ്ട്. പക്ഷേ ഞാനും തിരിച്ച് ചെയ്യും. നീ ചെയ്യുന്നതൊക്കെ കൊള്ളാം ഞാനും ചെയ്യുമെന്ന് പറയും. ഞാൻ വെറുതെ ഇരിക്കുമ്പോൾ ഇവൾ ഓടിവന്ന് കാല് പിടിച്ചിട്ട് അങ്ങ് പോകും. ഞാൻ പുറകെ പോയി തിരിച്ച് അതുപോലെ ചെയ്യും. പുതിയ സിനിമകൾ, പരസ്യങ്ങൾക്ക് ഒക്കെ പോകുന്ന സമയത്താകും ഏറ്റവും കൂടുതലും അങ്ങനെ ചെയ്യുന്നത്.
സിനിമയിൽ കാണുന്നത് പോലെ ചായ എടുത്ത് തരുന്നു. കഴിക്കാൻ വിളമ്പി തരുന്നു. ഞാൻ കഴിച്ച പ്ലേറ്റിൽ ഭക്ഷണം കഴിക്കുന്നു. ആ കോൺസപ്റ്റ് ആണ് സ്വാസികയ്ക്ക് ഇപ്പോഴും. ഞാൻ പ്ലേറ്റ് കഴുകി കഴിഞ്ഞാൻ പിന്നെ ദേഷ്യമാണ്. രാവിലെ എണീറ്റാൽ ഞാൻ പത്രം വായിക്കുമ്പോൾ കാപ്പി കൊണ്ട് തരുന്ന തരം പഴയ കൺസെപ്റ്റ് ആണ് സ്വാസികയുടേത്. എന്നെ കിച്ചണിൽ പോലും കയറാൻ അനുവദിക്കാറില്ല. അഥവാ കയറിയാൽ അവിടെ പോയിരിക്ക് എന്ന് പറയും” എന്നാണ് പ്രേം പറഞ്ഞത്.
“ഷൂട്ടിന് ഒക്കെ പോവുമ്പോൾ അല്ലെങ്കിൽ പുതിയ സിനിമയൊക്കെ തുടങ്ങുമ്പോഴാണ് അങ്ങനെ ചെയ്യാറുള്ളത്. അതെന്റെ ഒരു വിശ്വാസമാണ്. പലപ്പോഴും പ്രേം അറിയാതെ ഞാൻ കാല് തൊട്ട് തൊഴാറുണ്ട്. അത് കണ്ടാൽ ആണ് തിരിച്ചു ചെയ്യാറുള്ളത്. ആദ്യം എൻ്റെ കാല് തിരിച്ചുപിടിക്കും എന്ന് പറഞ്ഞപ്പോൾ ഒരു തമാശ ആയിട്ടേ കരുതിയുള്ളു. പക്ഷേ കല്യാണ ദിവസം മുതൽ അങ്ങനെയാണ്. ഞാൻ എപ്പോഴൊക്കെ കാല് പിടിക്കുന്നോ അപ്പോഴൊക്കെ പ്രേമും തിരിച്ചു ചെയ്യാറുണ്ട്.” എന്ന് സ്വാസികയും പറഞ്ഞു. ജനുവരിയിലാണ് സ്വാസികയും പ്രേമും വിവാഹിതരായത്.
