അന്താരാഷ്ട്ര ക്രിക്കറ്റിൽ 400 വിക്കറ്റ് പിന്നിട്ട് ഇന്ത്യൻ പേസർ ജസ്പ്രീത് ബുംറ. ബംഗ്ലാദേശിനെതിരായ മത്സരത്തിൽ ഹസൻ മഹ്‌മൂദിനെ വിരാട് കോഹ്ലിയുടെ കയ്യിലെത്തിച്ചാണ് ബുംറ ചരിത്ര നേട്ടം സ്വന്തമാക്കിയത്. ടെസ്റ്റിൽ 159 വിക്കറ്റും ഏകദിനത്തിൽ 149 വിക്കറ്റും ടി20-യിൽ 89 വിക്കറ്റുമാണ് ബുംറയുടെ സമ്പാദ്യം.
മത്സരത്തിൽ ഇതിനോടകം ബുംറ നാല് വിക്കറ്റുകളാണ് സ്വന്തമാക്കിയത്. ശദ്‌മാൻ ഇസ്ലാം, മുശ്‌ഫിഖു റഹീം, ഹസൻ മഹ്‌മൂദ്, തസ്കിൻ അഹ്‌മദ് എന്നിവരെയാണ് ബുംറ കൂടാരം കയറ്റിയത്. ചെറിയ ഇടവേളക്ക് ശേഷം ദേശീയ ടീമിലേക്ക് മടങ്ങിയെത്തിയ ജസ്പ്രീത് ബുംറ നാല് വിക്കറ്റുമായി തിരിച്ചുവരവ് ഗംഭീരമാക്കിയെന്നത് ആരാധകരിൽ ആവേശമാണ് സൃഷ്ടിച്ചത്.
മത്സരത്തിൽ ബുംറയ്ക്കൊപ്പം ആകാശദീപ്, രവീന്ദ്ര ജഡേജ എന്നിവർ രണ്ട് വിക്കറ്റും മുഹമ്മദ് സിറാജ് ഒരു വിക്കറ്റും നേടി.
