അബുദാബിയിൽ പുതിയ ടാക്സി ബുക്കിംഗ് സേവനം പ്രഖ്യാപിച്ച് അബുദാബി മൊബിലിറ്റി. ഇൻ്റർനാഷണൽ റൈഡ് ഹെയ്‌ലിംഗ് സ്‌മാർട്ട് ആപ്ലിക്കേഷനായ യാംഗോ വഴിയും ഇനി എമിറേറ്റിൽ ടാക്സി ബുക്ക് ചെയ്യാൻ സാധിക്കും.
യാത്രക്കാർക്ക് ഇപ്പോൾ പൊതു, സ്വകാര്യ ടാക്സികളും ലൈസൻസുള്ള സ്വകാര്യ വാഹനങ്ങളും ബുക്ക് ചെയ്യാം. അബുദാബി മൊബിലിറ്റിയുമായി സഹകരിച്ച് യാംഗോ അബുദാബിയിൽ അവതരിപ്പിക്കുന്നതിൽ അഭിമാനമുണ്ടെന്ന് യാംഗോ ജിസിസി ജനറൽ മാനേജർ ഇസ്‌ലാം അബ്ദുൾ കരീം പറഞ്ഞു.
യാംഗോ മൊബൈൽ ആപ്പിന് ഇപ്പോൾ 1,500-ലധികം രജിസ്റ്റർ ചെയ്ത ടാക്സികളാണ് നിലവിലുള്ളത്. അറബിക്, ഇംഗ്ലീഷ്, മറ്റ് പല ഭാഷകളിലും ഫോണിൽ ആപ്ലിക്കേഷൻ സൗജന്യമായി ഡൗൺലോഡ് ചെയ്യാനുള്ള സൗകര്യവും ലഭ്യമാണ്. അബുദാബിയിലെ യാത്രക്കാർക്ക് ആപ്പ് വഴിയോ 600535353 എന്ന നമ്പറിൽ വിളിച്ചോ ടാക്സികൾ ബുക്ക് ചെയ്യാനും സാധിക്കും.
