ഗാർഹിക തൊഴിലാളികളും തൊഴിലുടമകളും റിക്രൂട്ട്‌മെൻ്റ് കമ്പനികളും തമ്മിലുള്ള തർക്കങ്ങൾക്ക് പുതിയ നിയന്ത്രണം ഏർപ്പെടുത്തി യുഎഇ. രാജ്യത്തെ ഗാർഹിക തൊഴിലാളി നിയമത്തിൻ്റെ ചില ഭാഗങ്ങളാണ് ഭേദഗതി ചെയ്തത്.
പുതിയ നയമനുസരിച്ച് വീട്ടുജോലിക്കാരുടെ എല്ലാ തർക്കങ്ങളും അവസാന ആശ്രയമെന്ന നിലയിൽ അപ്പീൽ കോടതിക്ക് പകരം ഫസ്റ്റ് ഇൻസ്റ്റൻസ് കോടതിയിലാണ് പരിഗണിക്കുക. അതേസമയം, നിയുക്ത സമയപരിധിക്കുള്ളിൽ ഹ്യൂമൻ റിസോഴ്‌സസ് ആന്റ് എമിറേറ്റൈസേഷൻ (മൊഹ്രെ) മന്ത്രാലയം നടത്തുന്ന ഒത്തുതീർപ്പിൽ പരിഹാരമായില്ലെങ്കിൽ മാത്രമേ കേസ് കോടതിയിലെത്തുകയുള്ളൂ.
ക്ലെയിമിൻ്റെ ആകെ തുക 50,000 ദിർഹത്തിൽ കവിയുന്നില്ലെങ്കിൽ ഗാർഹിക തൊഴിലാളി തർക്കങ്ങൾ പരിഹരിക്കാൻ മന്ത്രാലയത്തിന് അർഹതയുണ്ട്. മന്ത്രാലയത്തിൻ്റെ തീരുമാനത്തെ എതിർക്കുന്നതിനായി തർക്കത്തിലെ ഏതൊരു കക്ഷിക്കും അറിയിപ്പ് ലഭിച്ച് 15 പ്രവൃത്തി ദിവസങ്ങൾക്കുള്ളിൽ കോടതിയിൽ ഒരു കേസ് ഫയൽ ചെയ്യാം. ഈ കേസിൽ ഫസ്റ്റ് ഇൻസ്റ്റൻസ് കോടതിയുടെ വിധി അന്തിമമാണ്.
