വയനാട് ജില്ലയിലെ മേപ്പാടിയിലുണ്ടായ ഉരുൾപ്പൊട്ടലിൽ ദുരിതമനുഭവിക്കുന്നവർക്ക് ആശ്വാസമായി കേരള ബാങ്ക്. ദുരന്തത്തിൻ്റെ പശ്ചാത്തലത്തിൽ ചൂരൽമല ബ്രാഞ്ചിലെ ദുരിതബാധിതരുടെ വായ്പകൾ എഴുതിത്തള്ളുമെന്നാണ് കേരള ബാങ്ക് പ്രഖ്യാപിച്ചിരിക്കുന്നത്. ഉരുൾപൊട്ടലിൽ കിടപ്പാടവും വസ്തുവകകളും നഷ്ടപ്പെട്ടവർക്ക് ആശ്വാസമാകുന്നതാണ് ഈ പ്രഖ്യാപനം.
കേരള ബാങ്ക് ചൂരൽമല ശാഖയിലെ വായ്‌പക്കാരിൽ ഉരുൾപൊട്ടലിൽ മരണപ്പെട്ടവരുടെയും ഈട് നൽകിയ വീടും വസ്തുവകകളും നഷ്‌ടപ്പെട്ടവരുടെയും മുഴുവൻ വായ്പകളും എഴുതിത്തള്ളുന്നതിനാണ് ബാങ്ക് ഭരണസമിതി യോഗത്തിൽ തീരുമാനമായത്.
ലോൺ എഴുതിത്തള്ളുന്നതിന് പുറമെ ദുരന്തബാധിതരുടെ പുനരധിവാസത്തിനായി കേരള ബാങ്ക് 50 ലക്ഷം രൂപയും മുഖ്യമന്ത്രിയുടെ ദുരിതാശ്വാസനിധിയിലേക്ക് നൽകിയിരുന്നു. അതോടൊപ്പം, ബാങ്കിലെ ജീവനക്കാർ സ്വമേധയാ അഞ്ച് ദിവസത്തെ ശമ്പളവും ദുരിതാശ്വാസനിധിയിലേക്ക് സംഭാവന ചെയ്യുമെന്നും വ്യക്തമാക്കിയിരുന്നു.
