കേരളത്തിലെ ദുരന്തഭൂമിയായി മാറി വയനാട്. ചൂരൽമല, മുണ്ടക്കൈ, അട്ടമല ഭാഗങ്ങളിലുണ്ടായ ഉരുൾപൊട്ടലിൽ മരണസംഖ്യ ഉയരുകയാണ്. ദുരന്തത്തിലെ മരണസംഖ്യ 277 ആയി ഉയർന്നു. 240 പേരെ കാണാതായെന്നാണ് അനൗദ്യോഗികമായി ലഭിക്കുന്ന വിവരം. അതേസമയം, മരണസംഖ്യ ഇനിയും ഉയരാനാണ് സാധ്യത. നിലവിൽ 82 ദുരിതാശ്വാസ ക്യാംപുകളിലായി 8,302 പേരാണുള്ളത്.
രക്ഷാപ്രവർത്തകർ രാവിലെ ചാലിയാറിൽ തിരച്ചിൽ ആരംഭിച്ചിട്ടുണ്ട്. കൂടുതൽ യന്ത്രങ്ങളെത്തിച്ചാണ് മൂന്നാം നാളിലെ തിരച്ചിൽ. 15 മണ്ണുമാന്തി യന്ത്രങ്ങൾ ഇന്നലെ രാത്രി മുണ്ടക്കൈയിൽ എത്തിച്ചിരുന്നു. കൂടുതൽ കട്ടിങ് മെഷീനുകളും ആംബുലൻസുകളും സ്ഥലത്ത് എത്തിക്കും. നിലവിലെ പ്രദേശത്തെ സാഹചര്യം വിലയിരുത്താൻ മുഖ്യമന്ത്രി പണറായി വിജയൻ വയനാട്ടിലേയ്ക്ക് പുറപ്പെട്ടിട്ടുണ്ട്.
അതേസമയം, സൈന്യം നിർമ്മിക്കുന്ന ബെയ്ലി പാലം ഇന്ന് ഉച്ചയോടെ പൂർത്തിയാകും. പാലം നിർമ്മാണം പൂർത്തിയായാൽ യന്ത്രത്തിന്റെ സഹായത്തോടെ തിരച്ചിൽ ഊർജ്ജിതമാക്കാൻ സാധിക്കും. മുണ്ടക്കൈയിൽ സ്ഥിരം പാലം നിർമ്മിക്കുന്നതുവരെ ബെയ്ലി പാലം നാടിന് നൽകുന്നുവെന്ന് മേജർ ജനറൽ വിനോദ് മാത്യു പറഞ്ഞു. കൂടുതൽ ഉറപ്പോടെ നിർമ്മിക്കുന്നതിനാലാണ് പാലം നിർമ്മാണത്തിന് കൂടുതൽ സമയമെടുക്കുന്നതെന്നും അദ്ദേഹം വ്യക്തമാക്കി.
