പാരീസ് ഒളിംപിക്‌സിന് തിരിതെളിയാൻ ഇനി മണിക്കൂറുകൾ മാത്രമാണ് അവശേഷിക്കുന്നത്. ലോകം ഉറ്റുനോക്കുന്ന പാരീസ് ഒളിംപിക്‌സിന്റെ ഉദ്ഘാടന ദിവസം ആഘോഷമാക്കുകയാണ് ഗൂഗിൾ. ഇതിനായി പ്രത്യേകമായി ഒരു ഡൂഡിൽ തന്നെയാണ് ഗൂഗിൾ അവതരിപ്പിച്ചിരിക്കുന്നത്.
ആനിമേറ്റഡ് കഥാപാത്രങ്ങൾ നദിയിലൂടെ ഒഴുകുന്നതായുള്ള ഡൂഡിലാണ് ഗൂഗിൾ അവതരിപ്പിച്ചത്. സെൻ നദിയിലൂടെ മത്സരാർത്ഥികളെ വഹിച്ചുകൊണ്ടുള്ള യാത്രയാണ് ഗൂഗിൾ ഡൂഡിലിൽ ആനിമേഷൻ രൂപത്തിൽ അവതരിപ്പിച്ചിരിക്കുന്നത്. അത്ലറ്റുകളെ ആനിമേറ്റഡ് കഥാപാത്രങ്ങളായി ചിത്രീകരിച്ചിട്ടുണ്ട്.
ഡൂഡിലിൽ ക്ലിക്ക് ചെയ്യുന്നതോടെ നേരിട്ട് പാരീസ് ഒളിമ്പിക്‌സിന്റെ കൂടുതൽ വിവരങ്ങൾ ഉൾപ്പെടുന്ന പേജുകളിലേക്കും വിവരങ്ങളിലേക്കും കടക്കാനും സാധിക്കും. ഒളിമ്പിക്സിലെ ഗെയിംസിനെ വ്യക്തമാക്കുന്ന ഗൂഗിൾ ഡൂഡിലിൻ്റെ രൂപകല്പന ഇതനോടകം ലോകശ്രദ്ധ നേടുകയും ചെയ്തിട്ടുണ്ട്.
