തിയേറ്ററിൽ മികച്ച പ്രതികരണം നേടിയ ചിത്രമാണ് ആസിഫ് അലി-ബിജു മേനോൻ എന്നിവരെ പ്രധാന കഥാപാത്രങ്ങളാക്കി ജിസ് ജോയ് ഒരുക്കിയ ‘തലവൻ’. ചിത്രത്തിന്റെ 65-ാം ദിന വിജയാഘോഷ ചടങ്ങിനിടെ സിനിമയുടെ രണ്ടാം ഭാഗത്തേക്കുറിച്ചുള്ള പ്രഖാപനം എത്തിയിരിക്കുകയാണ്. തലവനിൽ നിർണായക വേഷം കൈകാര്യം ചെയ്‌ത നടനും സംവിധായകനുമായ ദിലീഷ് പോത്തനാണ് തലവന്റെ രണ്ടാം ഭാഗത്തെക്കുറിച്ച് പ്രഖ്യാപിച്ചത്.
സമീപകാലത്ത് മലയാള സിനിമയിൽ ഇറങ്ങിയ ഏറ്റവും മികച്ച ത്രില്ലറുകളിലൊന്നാണ് തലവൻ. രണ്ട് വ്യത്യസ്‌ത റാങ്കുകളിലുള്ള പൊലീസ് ഉദ്യോഗസ്ഥരുടെ ഇടയിലുണ്ടാകുന്ന പ്രശ്‌നങ്ങൾ ഒരു ഇൻവെസ്‌റ്റിഗേഷൻ ത്രില്ലറിന്റെ രൂപത്തിൽ പ്രേക്ഷകരുടെ മുന്നിലവതരിപ്പിച്ച ചിത്രമാണ് ‘തലവൻ’. മെയ് 24ന് തിയേറ്ററിലെത്തിയ ചിത്രം മികച്ച പ്രേക്ഷക പ്രശംസയാണ് നേടിയത്. ആസിഫ് അലിയുടെ കരിയറിലെ തന്നെ ഏറ്റവും വലിയ വിജയമായും ചിത്രം മാറി.
ചിത്രത്തെയും അണിയറ പ്രവർത്തകരെയും അഭിനന്ദിച്ച് ഉലകനായകൻ കമൽ ഹാസൻ തന്നെ എത്തിയിരുന്നു. തലവൻ ടീമിനെ നേരിൽ കാണണമെന്ന കമൽഹാസന്റെ ആഗ്രഹ പ്രകാരം ആസിഫ് അലി ഉൾപ്പെടെയുള്ളവർ കമൽ ഹാസനുമായി കൂടിക്കാഴ്ച നടത്തിയിരുന്നു. ഷൂട്ടിങ് തിരക്കുകൾ മൂലം ബിജു മേനോന് ടീമിനോപ്പം ചേരാൻ കഴിഞ്ഞില്ലെങ്കിലും തൻ്റെ നിറഞ്ഞ സന്തോഷം ബിജുവിനെ അറിയിക്കണമെന്ന് കമൽഹാസൻ തലവൻ ടീമിനെ പ്രത്യേകം അറിയിച്ചു.
